Պատերազմ Ուկրաինայում (լայվ բլոգ, թարմացվող)

Երեկ Վրաստանի մայրաքաղաք Թբիլիսիի կենտրոնում հազարավոր մարդիկ հավաքվել են հրապարակում և ունկնդրել Ուկրաինայի նախագահ Վլադիմիր Զելենսկու Կիևից հեռարձակվող ուղերձը, որը միաժամանակ ցուցադրել են եվրոպական տասնյակ երկրներում:

Երեկ Սերբիայի մայրաքաղաք Բելգրադում մոտ 4 հազար աջակողմյան ակտիվիստներ կազմակերպել են երթ` ի պաշտպանություն Ուկրաինայում Ռուսաստանի վարած պատերազմի:

Ակցիան կազմակերպել է Narodne patrole (Ժողովրդական պարեկություն) ազգայնական շարժումը:

Կանադայի վարչապետ Ջասթին Թրյուդոն երեկ Տորոնտոյում ուղղափառ եկեղեցում հանդիպել է կանադաբնակ ուկրաինացիների համայնքի ներկայացուցիչների հետ:

«Ուկրաինայի բախտը չբերեց, որ Պուտինն ընտրեց պատերազմի ուղին, բայց աշխարհի բախտը բերեց, որ առյուծների նման խիզախ ուկրաինացիները կանգնեցին Պուտինի դեմ և կռվում են: Եվ այդ կռվով նրանք բոլորիս հիշեցնում են մեր պարտքի մասին»,- ասել է Ջասթին Թրյուդոն:

Ամերիկայի Միացյալ Նահանգները և դաշնակիցները ՄԱԿ-ի Անվտանգության խորհրդում երեկ խստորեն դատապարտել են Զապորոժիեի ատոմակայանի շրջանում մարտական գործողություններ վարելու և կայանը գրոհով վերցնելու ռուսների մարտավարությունը:

Մարտի ընթացքում մի քանի ականներ հարվածել են Զապորոժիեի շրջանի Էներգոդար ավանի մոտ գտնվող ատոմակայանի շենքին:

Թուրրքիայի արտաքին գործերի նախարար Մևլութ Չավուշօղլուն այցելել է Բաքու:

«Ադրբեջանը և Թուրքիան ակտիվ ջանքեր են գործադրում Ուկրաինայում առճակատումը կարգավորելու համար», - Չավուշօղլուի հետ համատեղ ասուլիսում հայտարարել է Ադրբեջանի արտաքին գերատեսչության ղեկավար Ջեյհուն Բայրամովը:

Ռուսաստանի նախագահ Վլադիմիր Պուտինը Խիմկիում այսօր հանդիպել է «Աերոֆլոտ» ընկերության աշխատակցուհիների հետ: Հանդիպման ընթացքում նախագահը մեկնաբանել է արդիական միջազգային հիմնախնդիրները: Նա հավաստիացրել է, որ Ուկրաինայում իրականացվող «հատուկ օպերացիայի» կապակցությամբ Ռուսաստանի տարածքում հատուկ դրություն սահմանելու ծրագիր չկա:

«Աերոֆլոտ» ռուսական ավիաընկերությունը դադարեցնում է միջազգային բոլոր չվերթները: Բացառություն կարվի միայն Մինսկի ուղղության համար:

Չվերթները դադարեցվում են մարտի 8-ից:

Եթե Ուկրաինայի իշխանությունը շարունակի անել այն, ինչ անում է, դա կասկածի տակ կդնի ուկրաինական պետականության ապագան, և դրա համար ամբողջ պատասխանատվությունը նրանք են կրելու, այսօր հայտարարել է Ռուսաստանի նախագահը: