Պատերազմ Ուկրաինայում (լայվ բլոգ, թարմացվող)

Ռուսաստանի արտաքին գործերի նախարար Սերգեյ Լավրովն այսօր ասել է, թե հաշվի առնելով Ուկրաինայի նախագահ Վլադիմիր Զելենսկու վերջին կոշտ մեկնաբանությունները, ինքը մեծ լավատեսություն չունի ռուս-ուկրաինական խնդրի արագ կարգավորման վերաբերյալ:

Ադրբեջանի ավիաընկերությունները՝ AZAL-ը («Ադրբեջանական ավիագծեր») և Buta Airways-ը մարտի 6-ից դադարեցնում են բոլոր չվերթները Ռուսաստան: Այդ մասին այսօր հաղորդել է ազգային փոխադրող AZAL-ի մամլո վարչությունը:

Թուրքիայի և Ռուսաստանի արտաքին գերատեսչությունների ղեկավարներ Մևլութ Չավուշօղլուն և Սերգեյ Լավրովն այսօր զրուցել են հեռախոսով:

Ռուս-ուկրաինական բանակցությունների երրորդ փուլը տեղի կունենա գալիք երկուշաբթի օրը՝ մարտի 7-ին: Այդ մասին իր Ֆեյսբուքի էջում այսօր հայտնել է ուկրաինական պատվիրակության անդամ, «Ժողովրդի ծառա» կուսակցության խորհրդարանական խմբակցության ղեկավար Դավիդ Արախամիան:

Ռուսաստանի նախագահ Վլադիմիր Պուտինը ստորագրել է հրամանագիր, որով կառավարությանը կարգադրել է «կազմել ոչ բարեկամական գորրծողություններ իրականացնող երկրների ցանկը»:

Կրեմլում երեկ կայացել են Ռուսաստանի նախագահ Վլադիմիր Պուտինի և Իսրայելի վարչապետ Նաֆթալի Բենեթի բանակցությունները:

Բենեթը, որ կարճատև աշխատանքային այցով էր Մոսկվայում, ավելի քան երկու ժամ տևած հանդիպումից հետո զանգահարել է Ուկրաինայի նախագահ Վլադիմիր Զելենսկիին և խոսել զրույցի արդյունքների մասին։

Ուկրաինայի նախագահ Վլադիմիր Զելենսկին հեռախոսազրույց է ունեցել ԱՄՆ նախագահ Ջո Բայդենի հետ: Երկու երկրների ղեկավարները քննարկել են Վաշինգտոնից Ուկրաինային հետագա աջակցության, ինչպես նաև հակառուսական պատժամիջոցների հարցերը։

Ուկրաինայի նախագահ Վլադիմիր Զելենսկին այսօր իր տեսաուղերձում ասել է, որ ռուսական զորքերը պատրաստվում են ռմբակոծել Օդեսան։ «Սա ռազմական և պատմական հանցագործություն կլինի»,- նշել է Զելենսկին։

«Ազատ Եվրոպա/Ազատություն» ռադիոկայանի մոսկովյան բյուրոն դադարեցնում է աշխատանքը:

Մարտի 4-ին Ռուսաստանի դաշնային հարկային ծառայությունը Մոսկվայի արբիտրաժային դատարան դիմում է ներկայացրել մեդիաընկերության շահերը ներկայացնող «Ազատ Եվրոպա/Ազատություն» ռադիոկայան սահմանափակ պատասխանատվության ընկերությունը պարտադիր կարգով սնանկ ճանաչելու պահանջով:

Իտալիայի իշխանություններն առգրավել են ռուսաստանցի միլիարդատեր, նախագահ Վլադիմիր Պուտինի մերձավոր շրջապատի անդամ համարվող Ալիշեր Ուսմանովի և հեռուստալրագրող, Կրեմլի նվիրյալ գաղափարախոս Վլադիմիր Սոլովյովի անշարժ գույքը: