Պատերազմ Ուկրաինայում (լայվ բլոգ, թարմացվող)

Ամերիկայի Միացյալ Նահանգների պետական քարտուղար Էնթոնի Բլինքենն այսօր Բրյուսելում հայտարարել է, որ ՆԱՏՕ-ն պաշտպանելու է դաշինքի անդամ երկրների տարածքը Ռուսաստանի ագրեսիայի դեպքում: Այդ մասին նա խոսել է ՆԱՏՕ-ի արտաքին գործերի նախարարների արտակարգ ժողովում:

Նա նաև խստորեն դատապարտել է ռուսական բանակի հարձակումները քաղաքացիական բնակչության վրա և Զապորոժիեի ատոմակայանի շրջակայքում մարտական գործողությունների ծավալումը: Բլինքենի փոխանցմամբ, աննախադեպ լարված ճգնաժամը կարգավորելու միակ ելքը ռուսական զորքի անհապաղ հեռացումն է Ուկրաինայից:

Պուտինը հրաժարվում է դադարեցնել հարձակումները Ուկրաինայի վրա, Թվիթերում գրել է Ֆրանսիայի նախագահ Էմանյուել Մակրոնը ռուսաստանցի պաշտոնակցի հետ հեռախոսազրույցից հետո։ Վատթարագույնը դեռ առջևում է, մեկուկես ժամ տևած զրույցից հետո ահազանգել է Մակրոնը:

Ֆրանսիական լրատվամիջոցները, հղում անելով նախագահ Մակրոնի օգնականին, որը ցանկացել է անանուն մնալ, գրում են, որ Ռուսաստանի նախագահը ֆրանսիացի պաշտոնակցին ասել է՝ շատ վճռական է շարունակելու հարձակումները՝ «ամբողջ Ուկրաինան գրավելու» նպատակով։ Մակրոնն ի պատասխան Պուտինին ասել է՝ «կոպիտ սխալ» է գործում։

Ֆրանսիացի պաշտոնյան նաև փոխանցել է, որ Կրեմլի ղեկավարը շեշտել է՝ ռուսական բանակի այսպես կոչված «հատուկ գործողություններն» ընթանում են Մոսկվայի պլանի համաձայն, և որ իրավիճակը կսրվի, եթե ուկրաինացիները չընդունեն ռուսական կողմի պայմանները։

Կրեմլի մամլո ծառայության փոխանցմամբ, այսօր տեղի է ունեցել Ռուսաստանի և Բելառուսի նախագահներ Վլադիմիր Պուտինի և Ալեքսանդր Լուկաշենկոյի հեռախոսազրույցը:

Ռուսաստանի ղեկավարը բելառուս պաշտոնակցին պատմել է Ուկրաինայում «հատուկ գործողությունների ընթացքի մասին»: Լուկաշենկոն, ըստ Կրեմլի, այդ հարցում իր աջակցությունն է հայտնել Պուտինին:

Վրաստանի առողջապահության նախարարությունը կամավորներին կոչ է արել արյուն հանձնել Ուկրաինայի համար: Այդ մասին հաղորդվում է նախարարության Ֆեյսբուքի էջում:

Նախարարությունը հայտնում է, որ հավաքված արյունը պահանջված մշակումից հետո կուղարկվի Ուկրաինա՝ որպես մարդասիրական օգնություն:

Վրաստանի կառավարությունը երկուշաբթի օրը 100 տոննա մարդասիրական օգնություն է ուղարկել Ուկրաինա: Բացի այդ, Վրաստանում հյուրանոցներում անվճար տեղավորում են ուկրաինացի այն զբոսաշրջիկներին, ովքեր պատերազմի պատճառով չեն կարողանում տուն վերադառնալ:

Մոսկվայի քաղաքապետարանը պաշտոնապես մերժել է Ուկրաինայի դեմ պատերազմը դատապարտելու նպատակով մարտի 12-ին բողոքի երթ անցկացնելու «Յաբլոկո» կուսակցության դիմումը, որում երթի նպատակը նշվել է որպես «մոսկվացիների վերաբերմունքը հատուկ գործողության նկատմամբ»:

Ռուսաստանի իշխանություններն արգելում են Ուկրաինայի պարագայում կիրառել «պատերազմ» եզրույթը:

Քաղաքապետարանը մերժել է նաև մի խումբ ռուս ազգայնական հրապարակախոսների կողմից ներկայացված «Ժողովրդի և բանակի համերաշխության երթ» անվամբ միջոցառման հայտը:

Երկու մերժումներն էլ պատճառաբանվել են «համաճարակաբանական իրավիճակի» հանգամանքով:

Ուկրաինայում ընթացող պատերազմից խուսափելու համար այդ երկրում բնակվող 7 հազար 696 ադրբեջանցիներ տեղափոխվել են հարևան պետություններ:

Ադրբեջանի արտաքին գործերի նախարարության փոխանցմամբ, նրանց մեծ մասն ապաստանել է Մոլդովայում և Լեհաստանում, կան նաև Սլովակիա, Հունգարիա և Ռումինիա տեղափոխվածներ:

Թուրքիայի արտգործնախարար Մևլյութ Չավուշօղլուն հույս է հայտնել, որ հնարավոր կլինի կազմակերպել Ռուսաստանի և Ուկրաինայի գործընկերների հանդիպումը հաջորդ շաբաթավերջին Անթալիայում կայանալիք դիվանագիտական ֆորումի ժամանակ:

Թուրքիայի արտաքին գերատեսչության ղեկավարը նշել է, որ Սերգեյ Լավրովը հաստատել է իր մասնակցությունը, սակայն վստահ չեն, որ ստեղծված իրավիճակում Դմիտրի Կուլեբան կմասնակցի ֆորումին:

ՆԱՏՕ-ի գլխավոր քարտուղար Յենս Ստոլտենբերգն այսօր ասել է, թե Ուկրաինայում առաջիկայում իրավիճակը կվատթարանա:

«Առաջիկա երկու օրում, ամենայն հավանականությամբ, Ուկրաինայում ավելի վատ կացություն կստեղծվի, կզոհվեն և կտուժեն ավելի մեծ թվով մարդիկ, կլինեն ավելի շատ ավերածություններ»,- ասել է Ստոլտենբերգը:

Ուկրաինական կողմը հաստատում է, որ Եվրոպայի ամենախոշոր​՝ Զապորոժիեի​ ատոմակայանն անցել է ռուսական ուժերի վերահսկողության տակ։ Այդ մասին են հաղորդում նաև միջազգային լրատվամիջոցները։

Այսօրվա վաղ ժամերին մարտական գործողություններ են ծավալվել ​ ատոմակայանի տարածքում։ Ինտենսիվ մարտերի ընթացքում ատոմակայանի համալիրի շենքերից մեկում հրդեհ է բռնկվել, որը որոշ ժամանակ անց հաջողվել է մարել։