Պատերազմ Ուկրաինայում (լայվ բլոգ, թարմացվող)

Ուկրաինան և Ռուսաստանը պայմանավորվել են հումանիտար միջանցքներ ստեղծել՝ խաղաղ բնակիչներին տարհանելու համար․ համաձայնությունը ձեռք է բերվել այսօր կողմերի միջև տեղի ունեցած բանակցությունների արդյունքում։

«Ցավոք, Ուկրաինան դեռ չունի այն արդյունքները, որոնք անհրաժեշտ են: Որոշումներ կան միայն հումանիտար միջանցքների վերաբերյալ»,- «Ռոյթերին» ասել է Ուկրաինայի նախագահի խորհրդական Միխայլո Պոդոլյակը, հավելելով՝ երբ այդ միջանցքները ստեղծվեն, կողմերը մարդկանց տեղահանության ընթացքում հրադադար կպահպանեն։

Երեկ ելույթ ունենալով Անվտանգության խորհրդի նիստում՝ Ռուսաստանի նախագահ Վլադիմիր Պուտինը կրկին ասել է, թե ռուսներն ու ուկրաինացիները նույն ժողովուրդն են:

Պուտինը պնդել է, որ «ռազմական հատուկ գործողությունն» ընթանում է ըստ պլանի և գրաֆիկի, դրված բոլոր առաջադրանքները հաջողությամբ կատարվում են:

Ուկրաինայի իշխանությունները պնդում են, որ անցած գիշեր ռուսական զինուժը հարվածներ է հասցրել Եվրոպայում խոշորագույնը համարվող Զապորոժիեի ատոմակայանին, ինչի հետևանքով հրդեհ է բռնկվել էներգաբլոկներից մեկի հարևանությամբ և ԱԷԿ-ի ուսումնավարժական հատվածում։

Ժամեր առաջ տարածած տեսաուղերձով Ուկրաինայի նախագահ Վլադիմիր Զելենսկին հայտարարել է, որ ռուսական տանկերն ուղիղ հարվածներ են հասցրել ատոմային բլոկներին, և հավելել է, որ Ռուսաստանը նպատակ ունի կրկնել Չեռնոբիլի աղետը, և որ Մոսկվան զբաղվում է միջուկային ահաբեկչությամբ։

Հաղորդվում է, որ որոշ ժամանակ անց հրշեջները կարողացել են մուտք գործել ատոմակայանի տարածք, հրդեհը տեղայնացվել, ապա չեզոքացվել է, այրված հատվածը կազմում է մոտ 2 հազար քառակուսի մետր, զոհեր ու վիրավորներ չկան։ Ռադիացիոն ֆոնի խախտման մասին այս պահին տեղեկություն չկա։

Ատոմակայանի վեց էներգաբլոկներից միայն մեկն է աշխատում։

Ուկրաինայի նախագահ Վլադիմիր Զելենսկին լրագրողների հետ հանդիպմանը դիմել է Ռուսաստանի ղեկավար Վլադիմիր Պուտինին։

«Ի՞նչ ես ուզում մեզնից, հեռացիր մեր երկրից: Հիմա չես ուզում հեռանալ, արի նստենք բանակցությունների սեղանի շուրջ: Ես ազատ եմ, նստիր ինձ հետ, միայն թե ոչ 30 մետր հեռու, ինչպես Մակրոնին, Շոլցին և մյուսներին ես դիմավորում: Ես հարևան եմ, խոսիր ինձ հետ», - Ռուսաստանի նախագահին կոչ է արել Զելենսկին։

Զապորոժիեի ատոմակայանում ստեղծված իրավիճակը լրջորեն անհանգստացրել է միջազգային հանրությանը։

Ուկրաինայի նախագահի հետ հեռախոսազրույցից հետո ԱՄՆ նախագահ Ջո Բյադենը հարցը քննարկել է Միացյալ Նահանգների էներգետիկայի փոխնախարար Ջիլ Հրուբիի հետ, ով պատասխանատու է միջուկային անվտանգության համար։

Զելենսկիի հետ հեռախոսազրույց է ունեցել նաև Մեծ Բրիտանիայի վարչապետ Բորիս Ջոնսոնը, ով խոսակցությունից հետո հայտարարել է, թե «նախագահ Պուտինի խելացնոր քայլերն այժմ ուղղակի սպառնում են ամբողջ Եվրոպայի անվտանգությանը»։

Զապորոժիեի ատոմակայանում ստեղծված իրավիճակի կպակցությամբ Լոնդոնը շտապ հրավիրել է ՄԱԿ-ի Անվտանգության խորհրդի նիստ։

Ատոմային էներգիայի միջազգային գործակալության գլխավոր տնօրեն Ռաֆայել Գրոսին, հեռախոսազրույց ունենալով Ուկրաինայի վարչապետի հետ, կոչ է արել դադարեցնել մարտական գործողությունները Զապորոժիեի ատոմակայանի տարածքում, այլապես ռեակտորների վնասվելը լուրջ վտանգ կստեղծի։

The Daily Telegraph պարբերականի փոխանցմամբ, Մեծ Բրիտանիայի և Հյուսիսային Իռլանդիայի Միացյալ Թագավորության թագուհի Եղիսաբեթ երկրորդը «խոշոր գումար է տրամադրել ուկրաինայի փախստականների համար»:

Գումարը փոխանցվել է Արտակարգ իրավիճակների կոմիտեին (Disasters Emergency Committee):

Բուքինգհեմյան պալատը չի նշել գումարի չափը:

Մասնավոր նվիրատվություն են տրամադրել նաև Քեմբրիջի դուքս, իշխան Ուիլյամը և դքսուհի Քեյթ Միդլթոնը: Նրանք, ըստ The Daily Telegraph-ի, «որոշել են իրենց համերաշխությունը ցույց տալ Ուկրաինային»:

Միացյալ Նահանգներն ու Եվրամիությունը հայտարարել են, թե թիրախավորելու են Ռուսաստանի նախագահ Վլադիմիր Պուտինի օրոք հարստություն դիզած և քաղաքական ազդեցություն կուտակած օլիգարխներին, հայտնում է Reuters-ը։

«Երկրները համատեղում են ջանքերը, որպեսզի ուսումնասիրեն, թե օլիգարխները ինչպես կարող են շրջանցել պատժամիջոցները, ինչպես նաև նպատակ կա սահմանափակել տրաստային ընկերությունների դերը՝ ակտիվների պահպանման գործում», - լրատվական գործակալությանը փոխանցել է Եվրամիության պաշտոնյան, ով չի ցանկացել հրապարակել իր անունը։

Միևնույն ժամանակ, Միացյալ Նահանգները նոր պատժամիջոցներ է սահմանել ռուսաստանցի 19 օլիգարխների և նրանց ընտանիքների 47 անդամների նկատմամբ։