Պատերազմ Ուկրաինայում (լայվ բլոգ, թարմացվող)

Ֆրանսիայի նախագահ Էմանյուել Մակրոնն այսօր հեռախոսազրույց է ունեցել Ռուսաստանի նախագահ Վլադիմիր Պուտինի, այնուհետև՝ Ուկրաինայի նախագահ Վլադիմիր Զելենսկու հետ։ Այս մասին հայտնում է Ելիսեյան պալատը, առանց բացահայտելու քննարկված հարցերի բովանդակությունը։

Ըստ Ֆրանսիական լրատվամիջոցների լուրերի՝ Մակրոն-Պուտին հեռախոսազրույցը տևել է 90 րոպե։

Երեկ երեկոյան Ֆրանսիայի նախագահն ասել է, որ որոշել է պահպանել Ռուսաստանի նախագահի հետ շփումները Ուկրաինայի իրավիճակի հետ կապված։

Այսօր կեսօրին Փարիզի Աստվածամոր տաճարի զանգերը ղողանջել են՝ աջակցելու Ուկրաինայի ժողովրդին, զոհվածներին սգալու և աղոթելու խաղաղության համար։

Եվրոպայում հայտնի մյուս մեծ եկեղեցիների, այդ թվում՝ Հռոմի, Քյոլնի տաճարների զանգերը ևս Նոտր Դամի հետ ղողանջել են Ուկրաինայի համար։

Տաճարների շինարար-վարպետների եվրոպական ընկերակցությունը ասել է, որ Նորվեգիայից մինչև Մալթա, Իսպանիայից մինչև Ուկրաինա եկեղեցիները չեն ցանկանում լռել պատերազմի մասին։

Ռուս-ուկրաինական պատերազմի հետևանքով ազգությամբ հայ խաղաղ բնակիչ է զոհվել Ուկրաինայի Խերսոն քաղաքում։ Լուրը հաստատել է Սփյուռքի գործերի գլխավոր հանձնակատարի գրասենյակի հայրենադարձության հարցերով պատասխանատու Հովհաննես Ալեքսանյան։

Զոհվածը Ուկրաինայի քաղաքացի Վահիկ Սողոմոնյանն է, այլ մանրամասները ճշտվում են:

Ալեքսանյանի խոսքով՝ հիմա շատ ծանր վիճակ է Մարիոպոլում, Խերսոնում, որտեղից դուրս գալն այս պահին բարդ է։ Խարկովից արդեն իսկ հասցրել են դուրս գալ մի քանի հայկական խմբեր։

Ուկրաինայի խորհրդարանը այսօր հաստատեց «Համընդհանուր մոբիլիզացիայի մասին» նախագահ Վլադիմիր Զելենսկու հրամանագիրը։

Զելենսկին հրամանագիրը ստորագրել է փետրվարի 25-ին։

Ուկրաինայի պատվիրակությունը Կիևից ուղղաթիռով ժամանել է բանակցությունների վայր։ Այս մասին տեղից հաղորդում է ռուսական պետական ՏԱՍՍ գործակալությունը։

Հանդիպումն անցկացվում է Բելառուսում, Բելովեժյան թավուտ կոչվող վայրում։