Պատերազմ Ուկրաինայում (լայվ բլոգ, թարմացվող)

Ամերիկայի Միացյալ Նահանգների պետական քարտուղար Էնթոնի Բլինքենը մարտի 3-ից 8-ը կայցելի Եվրոպա: Առաջին կանգառը Բելգիայի մայրաքաղաք Բրյուսելն է, որտեղ պետքարտուղարը կմասնակցի Մեծ յոթնյակի արտաքին գերատեսչությունների ղեկավարների համաժողովին: Ապա Բլինքենը կմեկնի Լեհաստան, Մոլդովա, Լատվիա, Լիտվա և Էստոնիա:

Պետքարտուղարը Եվրոպայում կքննարկի Ուկրաինա Ռուսաստանի ներխուժմանը դաշնակից և գործընկեր պետությունների կողմից համակարգված տնտեսական պատժամիջոցներով արձագանքելու հարցը:

Մարիուպոլում երեկ շարունակվել են ինտենսիվ հրետակոծությունները, տեղական իշխանությունները հայտնում են զոհված երեխաների մասին: Ուկրաինայի արտակարգ իրավիճակների պետական ծառայության գնահատմամբ՝ ռազմական գործողությունների սկզբից ի վեր զոհվել է 2 հազար խաղաղ բնակիչ, սակայն նշվում է, որ դա ոչ ճշգրիտ տվյալ է։

ՄԱԿ-ի տվյալներով՝ պատերազմի հետևանքով Ուկրաինայից փախստականների թիվն արդեն գերազանցել է մեկ միլիոնը:

Ռուսաստանի տեղեկատվական դաշտը վերահսկող պետական մարմինը՝ «Ռոսկոմնադզոր»-ը սպառնում է արգելափակել «Ազատություն» ռադիոկայանի ռուսական ծառայության Svoboda.org կայքը: Գլխավոր դատախազությունը պահանջում է ուկրաինական պատերազմին առնչվող մի քանի նյութեր հեռացնել։ Այս մասին ասվում է չորեքշաբթի երեկոյան խմբագրության ստացած վեց ծանուցումներում։

Երեկ Ռուսաստանի կառավարությունը զգուշացրել է «Ամերիկայի ձայն»-ին իր մտադրության մասին՝ արգելափակել «Ամերիկայի ձայն»-ի ռուսալեզու www.golosameriki.com լրատվական կայքը, եթե այն չհեռացնի Ուկրաինա Ռուսաստանի ներխուժման հետ կապված նյութը: Դա հիմնավորվում է նրանով, թե «Ամերիկայի ձայն»-ի կայքը «պարունակում է ահաբեկչական գործողությունների կեղծ հաղորդումներ կամ հանրային հետաքրքրություն ներկայացնող այլ ոչ հավաստի տեղեկություններ»։

Ուկրաինայի իշխանությունները հայտնում են, որ գիշերը հրթիռակոծվել է Կիևը, մայրաքաղաքում առնվազն չորս պայթյուն է որոտացել:

Գիշերը ռուսական բանակը հրթիռակոծել է նաև Խարկովի մարզի Իզյում քաղաքը, զոհվել է առնվազն 8 մարդ։

Կրկին տեղեկություններ են ստացվել Ուկրաինայում քաղաքացիական օբյեկտների վրա օդային հարվածների և քաղաքացիական բնակչության շրջանում զոհերի մասին:

Միացյալ Նահանգները պատրաստ է դիվանագիտության Ուկրաինայի հարցում, եթե Ռուսաստանը դուրս բերի զորքերը և նույնպես գնա բանակցությունների։ Այս մասին չորեքշաբթի օրը մամուլի ասուլիսում հայտարարել է ԱՄՆ պետքարտուղար Էնթոնի Բլինքենը։

Պետքարտուղարի խոսքով՝ ԱՄՆ-ը բաց է Ռուսաստանի հետ բանակցություններ վարելու տարբեր ոլորտներում, այդ թվում՝ անվտանգության, սակայն դիվանագիտության ճանապարհի համար անհրաժեշտ է Ուկրաինայում դեէսկալացիան։

«Դոժդ» հեռուստաընկերության ղեկավար Տիխոն Դզյադկոն հեռացել է Ռուսաստանից։ Նրա փոխանցմամբ՝ նման որոշում են ընդունել նաև հեռուստաընկերության մի շարք աշխատակիցներ։

Դզյադկոն այդ մասին հայտնել է Տելեգրամ ալիքով տարածած հաղորդագրությունում և նշել, որ Գլխավոր դատախազության հայցով «Ռոսկոմնադզոր»-ի կողմից «Դոժդ»-ի կայքը և սոցցանցերի էջերը արգելափակվելուց հետո, ինչպես նաև մի շարք լրագրողների հասցեին սպառնալիքների պատճառով աշխատակիցների անձնական անվտանգությունը վտանգված է։

Միացյալ Նահանգների նախագահ Ջո Բայդենը ողջունել է ՄԱԿ-ի Գլխավոր ասամբլեայում քվեարկության արդյունքները, որոնք դատապարտել են Ուկրաինայի դեմ Ռուսաստանի ագրեսիան։

«ՄԱԿ-ի այս արտասովոր քայլը ցույց է տալիս ինքնիշխան հարևանի վրա Ռուսաստանի սարսափելի հարձակման կապակցությամբ գլոբալ վրդովմունքի չափը և ցույց է տալիս աննախադեպ համաշխարհային միասնություն», - ասվում է Բայդենի հայտարարության մեջ: - «Այսօրվա քվեարկությունը ցույց տվեց Պուտինի մեկուսացումը»։

ԱՄՆ նախագահի խոսքով՝ Ռուսաստանի նախագահը հարձակվել է ոչ միայն Ուկրաինայի, այլև համաշխարհային խաղաղության և անվտանգության հիմքերի և այն ամենի վրա, ինչ պաշտպանում է ՄԱԿ-ը։

«Միասին մենք պետք է Ռուսաստանին պատասխանատվության ենթարկենք իր գործողությունների համար», - եզրափակել է Ջո Բայդենը։

«Էխո Մոսկվի»-ի տնօրենների խորհուրդը որոշել է լուծարել ռադիոկայանը և կայքը, հայտարարել է գլխավոր խմբագիր Ալեքսեյ Վենեդիկտովը։

Բացի այդ, «Ռոսկոմնադզոր»-ը Google-ից պահանջել է հեռացնել «Էխո Մոսկվի» հավելվածը, հավելել է Վենեդիկտովը։

Սանկտ Պետերբուրգում երեկ երեկոյան ոստիկանները ուժ կիրառելով բերման են ենթարկել հակապատերազմական ակցիայի 235 մասնակիցների։

Ուկրաինա ներխուժումից հետո Ռուսաստանի մի շարք քաղաքներում, հիմնականում Մոսկվայում և Սանկտ Պետերբուրգում բողոքի ակցիաներ են անցկացվում պատերազմի դեմ։