Պատերազմ Ուկրաինայում (լայվ բլոգ, թարմացվող)

Մոլդովայի արտգործնախարարությունը Բելառուսի դեսպանից բացատրություններ է պահանջել Բելառուսի նախագահ Ալեքսանդր Լուկաշենկոյի ցուցադրած քարտեզի հարցով։ Լուկաշենկոն, մասնավորապես, ցույց է տվել Ուկրաինայում ռազմական գործողությունների քարտեզը՝ հարվածների ուղղություններով։ Դրանում սլաքներից մեկը ուղղված է եղել դեպի Մոլդովա և Մերձդնեստր։

Ալեքսանդր Լուկաշենկոյի հիշատակած քարտեզի վրա Ուկրաինան բաժանված է չորս մասի, և դրանցից միայն մեկում (երկրի արևմուտքում) չկան ռազմական հարձակումներ ցույց տվող սլաքներ։ Այդ քարտեզի համաձայն` Ուկրաինայի դեմ հարվածներից մեկը պետք է հասցվի Բելառուսի տարածքից։

ԵՄ-ն ռուսական յոթ բանկերի դուրս թողեց SWIFT համաշխարհային ցանցից։

Միջբանկային հաղորդագրությունների անվտանգ ցանցից կտրված բանկերն են Ռուսաստանի երկրորդ խոշորագույն վարկատուն՝ VTB-ն, ինչպես նաև Bank Otkritie-ն, Novikombank-ը, Promsvyazbank-ը, Rossiya Bank-ը, Sovcombank-ը և VEB-ը (Vnesheconombank)։

Նոբելյան մրցանակի 163 դափնեկիրներ բաց նամակ են հրապարակել`կոչ անելով Ռուսաստանին դադարեցնել ագրեսիան Ուկրաինայի նկատմամբ:

Մեկ շաբաթ առաջ սկսված ռազմական գործողությունները համեմատելով նացիստական Գերմանիայի քաղաքականության հետ` նամակի հեղինակները պնդում են, թե «այս հակամարտության ողջ պատասխանատվությունն ընկնում է Ռուսաստանի իշխանության վրա` նախագահ Պուտինի գլխավորությամբ»:

Նամակը ստորագրողների շարքում միայն մեկ ռուսաստանցի կա` ֆիզիկոս Անդրեյ Գեյմը, ով ապրում է արտասահմանում:

Պատերազմի յոթ օրերի ընթացքում Ուկրաինայում զոհվել է ավելի քան 2000 ուկրաինացի՝ չհաշված զինվորականները, այս մասին ասվում է Ուկրաինայի արտակարգ իրավիճակների պետական ծառայության հաղորդագրությունում, որը հրապարակվել է գերատեսչության ֆեյսբուքյան էջում։

Աղբյուրի համաձայն` Ուկրաինայի տարբեր բնակավայրերում ավերվել են հարյուրավոր տրանսպորտային ենթակառուցվածքներ, բնակելի շենքեր, հիվանդանոցներ և մանկապարտեզներ։ ՄԱԿ-ի Մարդու իրավունքների գերագույն հանձնակատարի գրասենյակի ներկայացուցիչ Էլիզաբեթ Թրոսելը մարտի 1-ին հայտնել է, որ փետրվարի 24-ից Ուկրաինայում առնվազն 136 խաղաղ բնակիչ է զոհվել, այդ թվում՝ 13 երեխա, վիրավորվել՝ 400 մարդ։

Եվրամիությունն արգելել է եվրոյի թղթադրամների վաճառքը, մատակարարումն ու արտահանումը Ռուսաստան։ Արգելվում է եվրո փոխանցել ֆիզիկական և իրավաբանական անձանց, կազմակերպություններին և պետական մարմիններին, այդ թվում՝ Կենտրոնական բանկին։

Ռուսաստանի Պետդուման մտադիր է վերանայել ռազմական գործողությունների ժամանակ ռուսական բանակի գործողությունների մասին այսպես կոչված` ֆեյքերի հեղինակների բանտարկության մասին օրենքը։

Առաջարկը ներկայացրել է իշխող «Եդինայա Ռոսիա» կուսակցության պատգամավոր Վասիլի Պիսկարևը։ Դրանում հեղինակը առաջարկում է պատասխանատվություն սահմանել նաև Ռուսաստանի տնտեսության դեմ պատժամիջոցների կամ դրանց իրականացման կոչերի համար։

Ռուսաստանի պաշտպանության նախարարությունը առաջին անգամ պաշտոնապես թվեր հրապարակեց Ուկրաինայի մարտական գործողություններում իր սեփական կորուստների մասին։

ՌԴ պաշտպանության նախարարության մամուլի խոսնակը հայտնել է, որ Ուկրաինայում զոհվել է 498 ռուսաստանցի զինծառայող, 1597-ը վիրավորվել են։

ՄԱԿ-ի Գլխավոր ասամբլեայի հատուկ նստաշրջանը մարտի 2-ին բանաձև ընդունեց` դատապարտելով Ռուսաստանի ներխուժումը Ուկրաինա։ «Ագրեսիա Ուկրաինայի դեմ» վերնագրով բանաձևին ՄԱԿ-ի 193 անդամներից կողմ են քվեարկել 141-ը, դեմ` ընդամենը 5-ը, ձեռնապահ է մնացել 35 երկիր։ Հայաստանը ձեռնպահների թվում է, ինչպես օրինակ` Չինաստանը, Հնդկաստանը, Իրանը և այլն։

Դեմ քվեարկած 5 երկրներն են՝ Ռուսաստանը, Բելառուսը, Սիրիան, Հյուսիսային Կորեան ու Էրիթրեան։

Միացյալ Նահանգների իշխանություններն արգելափակող պատժամիջոցներ են սահմանում Ռուսաստանի պաշտպանական ոլորտի 22 խոշոր ընկերությունների նկատմամբ:

«Այդ լայնածավալ սանկցիաների հետևանքով սպառազինություններ արտադրող ռուսական ընկերությունները զգալի կորուստներ են կրելու, ընդհանուր հաշվով ցուցակում կհայտնվեն 22 կառույցներ, որոնք կապված են ռազմարդյունաբերական համալիրի հետ», - ասվում է ԱՄՆ Պետդեպարտամենտի հաղորդագրությունում:

Ըստ հաղորդագրության, ցուցակում ընկերություններ են, որոնք ռուսական բանակի համար արտադրում են մարտական օդանավեր, զրահատեխնիկա, ռադիոէլեկտրոնային պայքարի միջոցներ և անօդաչու թռչող սարքեր: