- Հեղինակ՝ Լուսինե Մուսայելյան
Ռուսական պատվիրակությունը բանակցությունների վայր կժամանի չորեքշաբթի օրը երեկոյան ժամերին և պատրաստ կլինի Ուկրաինայի ներկայացուցիչների հետ հանդիպմանը։ Այս մասին, ՏԱՍՍ գործակալության փոխանցմամբ, հայտարարել է ՌԴ նախագահի խոսնակ Դմիտրի Պեսկովը։
«Այսօր օրվա երկրորդ կեսին, երեկոյան կողմ, մեր պատվիրակությունը կլինի տեղում: [Կսպասեն] ուկրաինացի բանակցողներին: Մեր պատվիրակությունը պատրաստ կլինի շարունակել զրույցն այսօր երեկոյան», - ասել է Պեսկովը:
Նոր հանդիպման վայրի մասին ճշտող հարցին ի պատասխան՝ Կրեմլի ներկայացուցիչը նշել է, որ նախապես չի ասի։
Պաշտոնական Կիևն առայժմ չի հաստատել իր մասնակցությունը բանակցությունների երկրորդ փուլին։ Ուկրաինայի նախագահ Վլադիմիր Զելենսկին երեքշաբթի օրը հայտարարել է, որ բանակցություններից առաջ Ռուսաստանը պետք է դադարեցնի ուկրաինական քաղաքների ռմբակոծությունները։
Պատերազմի յոթերորդ օրը Կիևը դիմավորում է վատթարագույնին պատրաստության վիճակում. Ռուսաստանի պաշտպանության նախարարությունը հայտարարել է Ուկրաինայի մայրաքաղաքի օբյեկտներին «ճշգրիտ հարվածներ» հասցնելու պլանների մասին:
Կիևի հյուսիսային մատույցներում ռուսական զրահատեխնիկայի մեծ կենտրոնացման մասին հաղորդագրություններ են ստացվել, և ռուսական հրամանատարությունը հայտնել է, որ քաղաքացիական անձինք կարող են լքել քաղաքը:
- Հեղինակ՝ Լիլիթ Հարությունյան
"Сбербанк"-ը հայտարարում է եվրոպական շուկայից դուրս գալու մասին։
«Ներկա իրադրության մեջ "Сбербанк"-ը որոշել է դուրս գալ եվրոպական շուկայից: Խմբի դուստր բանկերը բախվել են միջոցների աննորմալ արտահոսքի, աշխատակիցների և մասնաճյուղերի անվտանգությանը սպառնալիքի», - ասված է բանկի տարածած հայտարարությունում:
Նշվում է, որ Ռուսաստանի Կենտրոնական բանկի հրամանի պատճառով "Сбербанк"-ը չի կարողանա լիկվիդայնություն մատակարարել եվրոպական դուստր բանկերին։
«Միևնույն ժամանակ, "Сбербанк"-ի դուստր բանկերն ունեն կապիտալի և ակտիվների բարձր մակարդակ, հաճախորդների ավանդներն ապահովագրված են տեղական օրենսդրության համաձայն: Բանկի ակտիվները բավարար են բոլոր ավանդատուներին վճարումներ կատարելու համար», - ասված է հայտարարությունում:
Ուկրաինայի Խերսոն քաղաքը ռուսական ուժերը վերցրել են լիակատար վերահսկողության տակ։ Այդ մասին այսօր ճեպազրույցում հայտարարել է Ռուսաստանի պաշտպանության նախարարության պաշտոնական ներկայացուցիչ Իգոր Կոնաշենկովը։
«Ռուսական զինված ուժերի ստորաբաժանումները լիովին վերահսկողության տակ են վերցրել Խերսոնի շրջկենտրոնը: Քաղաքացիական ենթակառուցվածքները, բնակչության կենսապահովման օբյեկտները և քաղաքային տրանսպորտը գործում են ամենօրյա ռեժիմով: Քաղաքում պարենամթերքի և առաջին անհրաժեշտության ապրանքների պակաս չկա», - ասել է Կոնաշենկովը:
- Հեղինակ՝ Լուսինե Մուսայելյան
Հաագայի Արդարադատության միջազգային դատարանը մարտի 7-ին և 8-ին կսկսի Ուկրաինայի բողոքի քննությունը։
Կիևը Ռուսաստանին մեղադրում է ցեղասպանության մեջ։ Reuters-ի փոխանցմամբ՝ Ուկրաինան դատարանից պահանջում է միջանկյալ միջոցներ սահմանել։ Ուկրաինական կողմի շահերը դատարանում կպաշտպանի ամերիկյան Covington & Burling իրավաբանական ընկերությունը։
Հաագայի միջազգային քրեական դատարանի դատախազ Քարիմ Խանը հայտարարել է, որ կան ողջամիտ հիմքեր ենթադրյալ ռազմական հանցագործությունների և մարդկության դեմ հանցագործությունների վերաբերյալ հետաքննություն սկսելու համար։
Ուկրաինան ՄԱԿ-ի միջազգային դատարան Ռուսաստանի դեմ հայց է ներկայացրել փետրվարի 27-ին։
- Հեղինակ՝ Լուսինե Մուսայելյան
Հեռախոսազրույց են ունեցել Ֆրանսիայի և Ադրբեջանի նախագահները։ «Զրույցի ընթացքում նախագահները քննարկել են ճգնաժամային իրավիճակը Ուկրաինայում և Ուկրաինային մարդասիրական օգնության տրամադրումը», - հաղորդում է Ադրբեջանի նախագահի աշխատակազմի մամլո ծառայությունը։
Աղբյուրի համաձայն՝ Իլհամ Ալիևն ու Էմանյուել Մակրոնը մտքեր են փոխանակել նաև էներգետիկ հարցերի շուրջ։ Ադրբեջանի նախագահականը նշում է, որ հեռախոսազրույցը կայացել է Ֆրանսիայի նախագահի նախաձեռնությամբ։
- Հեղինակ՝ Լուսինե Մուսայելյան
Ռուս ընդդիմադիր գործիչ Ալեքսեյ Նավալնին բանտից ռուսաստանցիներին կոչ է արել ընդդեմ պատերազմի փողոց դուրս գալ, ակցիաներ կազմակերպել տարբեր քաղաքների գլխավոր հրապարակներում՝ ամեն օր ժամը 14-ին և 19-ին:
«Եթե կարող եք երթ անցկացնել՝ արեք հանգստյան օրերին։ Այո, առաջին օրը հնարավոր է քիչ մարդ լինի, իսկ երկրորդ օրը՝ ավելի քիչ։ Բայց մենք պետք է ատամները սեղմելով, վախը հաղթահարելով դուրս գանք և պահանջենք դադարեցնել պատերազմը։ Յուրաքանչյուր ձերբակալվածի պետք է փոխարինելու գա երկու հոգի», - հայտարարել է Նավալնին։
Ռուսաստանյան աղբյուրների համաձայն` փետրվարի 24-ից երկրում պատերազմի դեմ ցույցերի շուրջ 7 հազար մասնակից է ձերբակալվել։