- Հեղինակ՝ Լուսինե Մուսայելյան
Մյունխենի քաղաքապետ Դիթեր Ռեյթերը հայտարարել է Մյունխենի ֆիլհարմոնիկ նվագախմբի գլխավոր դիրիժոր, ռուս երաժիշտ Վալերի Գերգիևի պաշտոնանկության մասին։
Ռուսաստանի նախագահ Վլադիմիր Պուտինի հետ մտերիմ հարաբերություններով հայտնի երաժիշտը հրաժարվել է հստակ, միանշանակ և անվերապահորեն դատապարտել Ռուսաստանի ներխուժումը Ուկրաինա, պարզաբանել է Գերգիևի գործատուն։
68-ամյա Գերգիևը Ռուսաստանի ժողովրդական արտիստ է, արժանացել է աշխարհի տարբեր երկրների բազմաթիվ պարգևների ու ամենաբարձր կոչումների, աշխատել է առաջատար նվագախմբերի հետ։
- Հեղինակ՝ Լուսինե Մուսայելյան
Ուկրաինան հետ է կանչում Ղրղըզստանում և Վրաստանում իր դեսպաններին։ «Մեզ օգնել ցանկացող կամավորներին խոչընդոտելու, պատժամիջոցների հարցում ոչ բարոյական դիրքորոշման պատճառով», - պարզաբանել է Ուկրաինայի նախագահ Վլադիմիր Զելենսկին Եվրախորհրդարանի արտահերթ նիստում իր հեռավար ելույթի ընթացքում։
Ուկրաինա Ռուսաստանի ներխուժումից հետո Վրաստանի վարչապետ Իրակլի Ղարիբաշվիլին հայտարարել էր, որ Թբիլիսին չի պլանավորում միանալ Մոսկվայի դեմ Արևմուտքի տնտեսական և ֆինանսական պատժամիջոցներին, նաև բացառել էր, որ կուղևորվի Կիև՝ աջակցություն հայտնելու ուկրաինացի ժողովրդին։
Վրաստանի առաջնորդի այս հայտարարությունները երկրում աննախադեպ բողոքի ցույցեր են հարուցել, որի մասնակիցները պահանջում են Ղարիբաշվիլիի հրաժարականը:
- Հեղինակ՝ Հեղինե Բունիաթյան
Ռուսաստանը պարտավոր է անհապաղ դուրս բերել իր զորքերն ու դադարեցնել արյունահեղությունն Ուկրաինայում, այսօր հայտարարել է Գերմանիայի կանցլերը։ Օլաֆ Շոլցը զգուշացրել է, որ հակառակ դեպքում Մոսկվայի դեմ կսահմանվեն նոր պատժամիջոցներ։
«Ուկրաինան բառացիորեն կենաց-մահու կռիվ է տալիս»,- ասել է նա։
- Հեղինակ՝ Հեղինե Բունիաթյան
Ուկրաինայի նախագահ Վլադիմիր Զելենսկին հորդորել է Եվրախորհրդարանին աջակցել ԵՄ անդամ դառնալու՝ իր երկրի ցանկությանը։ Հատուկ նիստում դիմելով եվրոպացի պատգամավորներին՝ Զելենսկին պնդել է՝ Ուկրաինան պայքարում է՝ Եվրոպայի լիիրավ անդամ դառնալու համար։
«Կարծում եմ, որ այսօր մենք բոլորին ի ցույց ենք դնում՝ ինչ ենք ուզում և ինչի ենք ձգտում։ Եվրամիությունը, անկասկած, մեզ հետ շատ ավելի ուժեղ կլինի», -հայտարարել է նա՝ դատապարտելով ռուսական զորքերի ներխուժումն Ուկրաինա։
- Հեղինակ՝ Լուսինե Մուսայելյան
Ուկրաինայի նախագահ Վլադիմիր Զելենսկին Ռուսաստանն անվանել է «ահաբեկչական պետություն»։ Զելենսկիի մեղադրանքները հաջորդում են երեքշաբթի օրը Խարկովի կենտրոնական հրապարակում կառավարական շենքի հրթիռակոծմանը, որը Ուկրաինայի նախագահի խոսքով՝ «բաց, անթաքույց ահաբեկչություն» է:
Քաղաքային իշխանությունների տվյալներով՝ հարվածի հետևանքով զոհվել է առնվազն 10 մարդ, այդ թվում` հնդիկ ուսանող։
- Հեղինակ՝ Լուսինե Մուսայելյան
Ռուսաստանի պաշտպանության նախարարությունը նախազգուշացնում է Կիևի վրա հարվածներ հասցնելու մասին։
Նախարարության հայտարարության համաձայն՝ հարվածներ կհասցվեն Ուկրաինայի մայրաքաղաքում գտնվող անվտանգության ծառայության մի շարք շենքերի։ Ռուսական կողմը շենքերում (որոնք թվարկվել է հաղորդագրությունում) աշխատող և մոտակայքում ապրող քաղաքացիներին հորդորում է լքել իրենց տներն ու տարածքը:
- Հեղինակ՝ Լուսինե Մուսայելյան
Վրաստանը փորձում են ներքաշել հակամարտության մեջ, այս մասին հայտարարել է երկրի իշխող ուժի ղեկավար Իրակլի Կոբախիձեն` մեկնաբանելով Ուկրաինայի որոշումը՝ դեսպանին Թբիլիսիից հետ կանչելու վերաբերյալ։
«Մենք, Վրաստանը չենք ներքաշվի ռազմական հակամարտության մեջ։ Ուղիղ փորձ եղավ՝ Ուկրաինա կամավորների գործուղումը կազմակերպելու առումով, որպեսզի մեզ ներքաշեն ռազմական հակամարտության մեջ։ Դա չհաջողվեց, դրան հաջորդեց դեսպանի հետկանչը, և սա տխուր քայլ է», - ասել է Կոբախիձեն։