Պատերազմ Ուկրաինայում (լայվ բլոգ, թարմացվող)

ՄԱԿ-ը 1,7 միլիարդ դոլարի մարդասիրական օգնություն է ցանկանում տրամադրել Ուկրաինային:

«Սա ամենամութ ժամն է Ուկրաինայի ժողովրդի համար», - հայտարարել է ՄԱԿ-ի հումանիտար հարցերով հանձնակատար Մարտին Գրիֆիթսը՝ կոչ անելով պաշտպանել հասարակ ուկրաինացիների կյանքն ու արժանապատվությունը։

ՄԱԿ-ի տվյալներով՝ ավելի քան 660 հազար փախստական է լքել Ուկրաինան՝ Ռուսաստանի չհրահրված հարձակումից ի վեր, մոտ մեկ միլիոն էլ համարվում է ներքին տեղահանված։

Թուրքիայի պաշտպանության նախարար Հուլուսի Աքարն այսօր հեռախոսազրույց է ունեցել ռուս պաշտոնակից Սերգեյ Շոյգուի հետ և կոչ արել Ուկրաինայում անհապաղ հրադադար հաստատել` մարդասիրական նկատառումներից ելնելով։

Թուրքական կողմի հաղորդագրության համաձայն՝ Աքարը Շոյգուի հետ զրույցում նաև հայտարարել է, որ Թուրքիան կշարունակի ջանքերը տարածաշրջանային խաղաղության և մարդասիրական օգնության առաքման համար։

Ուկրաինան և Ռուսաստանը գերիների փոխանակում են կատարել առաջին անգամ այն բանից հետո, երբ Ռուսաստանը անցած շաբաթ լայնամասշտաբ ռազմական հարձակում գործեց Ուկրաինայի դեմ:

«Ազատության» ուկրաինական ծառայությունը, վկայակոչելով պաշտոնական աղբյուրները, հայտնում է, որ փոխանակումը տեղի է ունեցել Ուկրաինայի հյուսիս-արևելյան Սումի շրջանում։

Կիևում հեռուստաաշտարակի մերձակայքում պայթյուններ են հնչել: Ըստ Ներքին գործերի նախարարության, այն հրթիռակոծվել է, զոհվել է առնվազն 5 մարդ, կան վիրավորներ։

385 մետրանոց աշտարակը չի վնասվել, հեռարձակումները, սակայն, դադարեցվել են։ Ըստ տեղական լրատվամիջոցների, իշխանություններն այժմ փորձում են անցնել «պահուստային հեռարձակման»։

Կիևի հեռուստաաշտարակի մերձակայքում, որը ըստ երկրի ՆԳՆ-ի հրթիռակոծվել է, գտնվում է Բաբի Յառը, որտեղ գերմանացի նացիստները տասնյակ հազարավոր մարդկանց զանգվածային սպանդ են իրականացրել Երկրորդ համաշխարհային պատերազմի տարիներին։

«Ես դիմում եմ աշխարհին՝ ի՞նչ իմաստ ունի 80 տարի ասել՝ այլևս երբեք, եթե հիմա, երբ բոմբն ընկնում է Բաբի Յառում, աշխարհը լուռ է։ Պատմությունը կրկնվում է», - Թվիթերում գրել է Ուկրաինայի նախագահ Վլադիմիր Զելենսկին։

Ռուսաստանը պատրաստվում է բելառուսական զորք մտցնել Ուկրաինա, այսօր հայտարարել է այդ երկրի ռազմական հետախուզությունը։ Ըստ հաղորդագրության, Կրեմլը հատուկ ծրագրեր է կազմում, որպեսզի արդարացնի բելառուսական զորքի ներխուժումը։

Սոցիալական ցանցերում հրապարակված գրառման մեջ մասնավորապես, ասվում է, որ ըստ տվյալների, Ուկրաինայի հետ սահմանին այժմ տեղակայվել են մոտ 300 բելառուսական տանկեր։

Այս հաղորդագրությունից մոտ մեկ ժամ առաջ նախագահ Ալեքսանդր Լուկաշենկոն Անվտանգության խորհրդի նիստում հայտարարել էր, թե «Բելառուսի բանակը կազմ ու պատրաստ է, և եթե վտանգ լինի, ինքը կարող է 2-3 օրում զորքը մոբիլիզացնել»։

Ռուսաստանի նախագահ Վլադիմիր Պուտինը կրկնել է այն պայմանները, որոնց կատարման դեպքում պատրաստ է դադարեցնել պատերազմը Ուկրաինայի դեմ։

«Կիևը պետք է ճանաչի Լուգանսկի և Դոնեցկի «ժողովրդական հանրապետությունները», Ռուսաստանի ինքնիշխանությունը Ղրիմում, ապառազմականացվի և պարտավորվի հետագայում չհամալրել զինանոցը միջուկային զենքով»,- ասել է Պուտինը Վենեսուելայի նախագահ Նիկոլաս Մադուրոյի հետ զրույցում։