Պատերազմ Ուկրաինայում (լայվ բլոգ, թարմացվող)

ՄԱԿ-ում Ռուսաստանի դիվանագիտական առաքելության 12 անդամների հրաման է տրվել մինչև մարտի 7-ը լքել Միացյալ Նահանգները․ Վաշինգտոնը պնդում է, որ ռուսաստանցի պաշտոնյաները զբաղվել են ոչ դիվանագիտական գործունեությամբ։

Վաշինգտոնը դիվանագետների արտաքսման որոշումը չի կապում Ուկրաինայի դեմ Ռուսաստանի նախաձեռնած պատերազմի հետ, ամերիկյան դիվանագիտական գերատեսչության խոսնակ Նեդ Փրայսը հայտարարել է, որ որոշման մանրամասները կներկայացնեն ավելի ուշ։

ՄԱԿ-ում Ռուսաստանի դեսպան Վասիլի Նեբենզյան գործընկերների արտաքսումը գնահատել է որպես ՄԱԿ-ի համաձայնագրի «կոպիտ խախտում» և դիվանագիտական հարաբերությունները կարգավորող Վիեննայի կոնվենցիայի ոտնահարում։

Ուկրաինայի նախագահ Վլադիմիր Զելենսկին հայտարարել է, որ ռուսական կողմի հետ երեկվա բանակցություններին զուգահեռ ուկրաինական քաղաքներն ինտենսիվ հրթիռակոծվել են։

«Նման պարզ ձևով Ռուսաստանը փորձում է ճնշում գործադրել։ Ժամանակ մի կորցրեք, մենք նման մարտավարություն չենք ընդունում», - ասել է Զելենսկին՝ միաժամանակ հավելելով, որ Կիևը կվերլուծի առաջին հանդիպման արդյունքները՝ երկրորդին պատրաստվելու համար:

Շարունակվում են ուկրաինական քաղաքների գնդակոծությունները՝ չնայած ռուսական և ուկրաինական պատվիրակությունների միջև երեկ տեղի ունեցած բանակցություններին։

Կիևցիները ևս մեկ գիշեր են անցկացրել ապաստարաններում: Ուկրաինայի մեծությամբ երկրորդ քաղաքը` Խարկովը, ենթարկվել է զանգվածային գնդակոծության: Բնակելի թաղամասերում պայթյունների և ավերածությունների բազմաթիվ ֆոտո և վիդեո ապացույցներ են հայտնվել, ըստ փորձագետների` Խարկովը գնդակոծվել է «Գրադ» և «Սմերչ» հրթիռային համակարգերից:

Ուկրաինական կողմը հայտնում է բազմաթիվ զոհերի մասին։

Այս գիշեր ռուսական բանակը գրոհ է ձեռնարկել նաև Խերսոն քաղաքի վրա։

Մոսկվան շարունակում է պնդել, որ ռուսական զինված ուժերը չեն սպառնում Ուկրաինայի խաղաղ բնակչությանը, և ուկրաինացի զինվորականներին մեղադրում է սադրանքների մեջ։

Ճապոնիայի կառավարությունը հավանություն է տվել արտահանման պատժամիջոցների սահմանմանը 49 ռուսական ընկերությունների և կազմակերպությունների դեմ, այդ թվում՝ «Ռոսօբորոնէքսպորտ»-ի, «Ռոստեխ»-ի, Անվտանգության դաշնային ծառայության և Արտաքին հետախուզության ծառայության նկատմամբ։ Այս մասին ասվում է երեքշաբթի օրը Ճապոնիայի արտգործնախարարության տարածած հայտարարության մեջ։

Բացի այդ, Ճապոնիայի կառավարությունը հավանություն է տվել Ռուսաստանի իշխանությունների և բանկերի ներկայացուցիչների ակտիվները սառեցնելու՝ ավելի վաղ հայտարարված որոշմանը։ Պատժամիջոցների տակ են հայտնվել ՌԴ նախագահ Վլադիմիր Պուտինը, Անվտանգության խորհրդի փոխնախագահ Դմիտրի Մեդվեդևը, արտգործնախարար Սերգեյ Լավրովը, Անվտանգության խորհրդի քարտուղար Նիկոլայ Պատրուշևը, պաշտպանության նախարար Սերգեյ Շոյգուն և Գլխավոր շտաբի պետ Վալերի Գերասիմովը, ինչպես նաև Կենտրոնական բանկը, Պետական զարգացման կորպորացիան և «Պրոմսվյազբանկ»-ը։

Միաժամանակ, մարտի 31-ից կներդրվեն բանկերի՝ բացառությամբ Կենտրոնական բանկի, ակտիվների սառեցման միջոցառումները։

Նաև Ճապոնիայի իշխանություններն արգելք են մտցնում ընդհանուր նշանակության ապրանքների արտահանման վրա, որոնց մատակարարումը կարող է օգնել ամրապնդել Ռուսաստանի ռազմական ներուժը։

Ամերիկյան Mastercard վճարային համակարգը հայտարարել է, որ դադարեցնում է համագործակցությունը ռուսական բազմաթիվ ֆինանսական ընկերությունների հետ:

Walt Disney ընկերությունը կդադարեցնի իր ֆիլմերի ցուցադրությունը ռուսական կինոթատրոններում, Netflix-ը հրաժարվում է ռուսական պետական ալիքները տարածել իր հարթակի միջոցով։

Հաագայի միջազգային քրեական դատարանը հետաքննություն է սկսել ռազմական հանցագործությունների և մարդկության դեմ հանցագործությունների վերաբերյալ, որոնք կատարվել են Ուկրաինա ռուսական ներխուժման ժամանակ։

Չեզոքության քաղաքականությանը ավանդաբար հավատարիմ մնացող Շվեյցարիան հայտարարել է, որ միանալու է Ռուսաստանի դեմ Եվրամիության պատժամիջոցներին։

Որպես պատասխան միջոցներից մեկը՝ Ռուսաստանը փակում է իր օդային տարածքը աշխարհի 36 երկրների համար։

Մարիուպոլ քաղաքի շրջափակումը կավարտվի այսօր, քաղաքը օղակի մեջ կվերցվի, հայտարարել է Դոնեցկի ինքնահռչակ հանրապետության միլիցիայի վարչության պետի տեղակալ Էդուարդ Բասուրինը։

«Ամեն ինչ պետք է անել, որպեսզի խաղաղ բնակչությունը չտուժի։ Ի դեպ, սննդի հետ կապված շատ մեծ խնդիր կա: Սա պետք է ինչ-որ կերպ կարգավորել և փորձել հնարավորինս արագ ապաշրջափակել քաղաքը, մարդասիրական միջանցք ստեղծենք, որպեսզի խաղաղ բնակիչները կարողանան դուրս գալ», - ասել է Բասուրինը։

Պաշտոնական Անկարան վճռական է՝ կիրառել Մոնտրոյի կոնվենցիայի դրույթները և փակել Բոսֆորի ու Դարդանելի նեղուցները ռուսական և ուկրաինական ռազմական նավերի համար, հայտարարել է Թուրքիայի նախագահը:

«Մենք վճռական ենք՝ կիրառել Մոնտրոյի կոնվենցիայով նեղուցներում նավերի երթևեկության հարցում մեզ տրված լիազորությունները, որպեզի կանխենք ճգնաժամի խորացումը: Ինչպես մշտապես ասել ենք, կողմ ենք Ուկրաինայի ինքնիշխանությանը, քաղաքական միասնությանն ու տարածքային ամբողջականությանը: Մենք անընդունելի ենք համարում Ռուսաստանի հարձակումը Ուկրաինայի տարածքների նկատմամբ, ողջունում ենք Ուկրաինայի ղեկավարության ու ժողովրդի մղած պայքարը», - հայտարարել է Ռեջեփ Թայիփ Էրդողանը նախօրեին կառավարության նիստից հետո:

Վաշինգտոնը նախազգուշացրել է Ռուսաստանի կողմից Ուկրաինայի մայրաքաղաքի վրա հարձակումների երկրորդ հնարավոր փորձի մասին։

Maxar ընկերության արբանյակային լուսանկարները վկայում են, որ դեպի Կիև ռուսական ռազմական տեխնիկայի 65 կիլոմետր երկարությամբ շարասյուն է շարժվում՝ զրահատեխնիկա, տանկեր, քարշակային հրետանի և բեռնատարներ։

Ամերիկացի սենատոր Քրիս Մերֆին Թվիթերում գրել է, որ ռուսական զորքերը կփորձեն շրջապատել և կտրել Կիևը առաջիկա շաբաթների ընթացքում: «Քաղաքի համար պայքարը երկար և արյունալի է լինելու, ուկրաինացիներն արագ պատրաստվում են փողոցային կռիվների», - գրել է սենատորը։

Ռուսական բանակը կշարունակի հատուկ ռազմական գործողությունը Ուկրաինայում մինչև իր առջև դրված նպատակներին հասնելը, հայտարարել է Ռուսաստանի պաշտպանության նախարարը։

Մոսկվայի հիմնական խնդիրը, Սերգեյ Շոյգուի խոսքով, Արևմուտքի ռազմական սպառնալիքից Ռուսաստանը պաշտպանելն է։

Ռուսաստանի ռազմական գերատեսչությունը պնդում է, որ ուկրաինական կողմը խաղաղ բնակիչներին օգտագործում է որպես կենդանի վահան։

Ռուսաստանի արտգործնախարար Սերգեյ Լավրովն էլ հայտարարել է, որ Ուկրաինայում ստեղծված իրավիճակը Կիևի «հանցավոր ռեժիմին արևմտյան երկրների թողտվության» արդյունքն է։ Նաև, ըստ նրա, Եվրոպան երկխոսության փոխարեն ընտրել է «ոչ լեգիտիմ պատժամիջոցների» ճանապարհը։ Լավրովի խոսքով՝ Արևմուտքը պատրաստակամություն չի ցուցաբերում Ռուսաստանին անվտանգության երաշխիքներ տրամադրելու և ՆԱՏՕ-ի ընդլայնումից հրաժարվելու հարցում։

ՄԱԿ-ի Մարդու իրավունքների խորհրդի նիստի ընթացքում Լավրովի հեռավար ելույթի ժամանակ մի խումբ դիվանագետներ, այդ թվում՝ Միացյալ Նահանգներից, Եվրամիությունից և Մեծ Բրիտանիայից, ցուցադրաբար լքել են նիստերի դահլիճը։