Պատերազմ Ուկրաինայում (լայվ բլոգ, թարմացվող)

«Ռուս-ուկրաինական պատերազմի հետևանքով Եվրոպա անցած ուկրաինացիներին իրավունք կընձեռվի ընդհուպ մինչև երեք տարի մնալ և աշխատել ԵՄ տարածքում», - այսօր Բրյուսելում հայտարարել է ԵՄ ներքին գործերի հանձնակատար Իլվա Յոհանսոնը։

Յոհանսոնի խոսքով՝ այս պահին Ուկրաինայից ԵՄ է անցել ավելի քան 400 հազար փախստական։ «Մենք, սակայն, ակնկալում ենք, որ դրանց թիվը կարող է հասնել մի քանի միլիոնի», - նշել է եվրոպացի պաշտոնյան։

«Ռուս-ուկրաինական բանակցություններն ավարտվել են», - քիչ առաջ իր տելեգրամյան ալիքում տեղեկացրել է Ուկրաինայի Ներքին գործերի նախարարի խորհրդական Անտոն Գերաշչենկոն՝ որևէ հավելյալ տեղեկություն չներկայացնելով։

«Այժմ հարկավոր է կենտրոնանալ գործնական խնդիրների լուծման, այլ ոչ թե Ուկրաինայի ԵՄ-ին անդամակցելու հարցի վրա», - արձագանքելով Կիևից հնչող հայտարարություններին՝ երկուշաբթի օրը հայտարարել է Եվրամիության արտաքին հարաբերությունների և անվտանգության գծով բարձրագույն ներկայացուցիչ Ժոզեպ Բորելը։

«Այսօր Ուկրաինայի անդամակցության հարցը օրակարգում չէ։ Անդամակցությունը այնպիսի մի գործընթաց է, որ տարիներ է տևում։ Այսօր մենք պետք է կենտրոնանանք առաջիկա ժամերի, այլ ոչ թե առաջիկա տարիների խնդիրների վրա», - նշել է Բորելը։

Ռուս-ուկրաինական բանակցությունների արդյունքում կողմերը համաձայնության են եկել դրանք առաջիկա օրերին շարունակելու հարցում:

Բրիտանիայի տրանսպորտի նախարարությունը նավահանգիստներին խնդրել է արգելել ռուսական դրոշի ներքո նավարկող բեռնատար, ուղևորատար կամ մասնավոր ռուսական նավերի մուտքը:

Բրիտանիան մտադիր է արգելել միկրոէլեկտրոնիկայի և նավարկման սարքավորումների վաճառքն ու փոխանցումը Ռուսաստանին:

Բացի այդ, Լոնդոնը սահմանում է ռուսական ֆինանսական կառույցների նկատմամբ նոր պատժամիջոցներ, որոնց թվում է դրանց անջատումը SWIFT միջազգային վճարային համակարգից:

Պատժամիջոցներ կսահմանվեն, մասնավորապես, Ռուսաստանի Կենտրոնական բանկի նկատմամբ:

Կսառեցվեն ВТБ, Совкомбанк և Внешэкономбанк դրամատների ակտիվները: Նշված հաստատություններին կարգելեն վճարումներ կատարել բրիտանական ֆունտ ստերլինգով և անկանխիկ տարբերակով:

Լոնդոնը նախապատրաստում է պատժամիջոցներ նաև Բելառուսի և Դոնեցկի երկու ինքնահռչակ կազմավորումների նկատմամբ:

ՖԻՖԱ-ն և ՈւԵՖԱ-ն փետրվարի 28-ին որոշել են Ռուսաստանի ֆուտբոլի հավաքականներին և ակումբներին թույլ չտալ մասնակցել այդ կառույցների հովանու ներքո անցկացվող մրցումներին:

Արգելքը սահմանվում է Ուկրաինայի վրա Ռուսաստանի ռազմական հարձակման կապակցությամբ:

Մոսկվայի «Սպարտակ»-ը դուրս է հանվել Եվրոպայի լիգայի մրցաշարից, որտեղ 1/8-ում պետք է հանդիպեր գերմանական «Լայպցիգ»-ի հետ:

Ավելի վաղ ՈւԵՖԱ-ն որոշել է Չեմպիոնների լիգայի 2021-22 թվականների մրցաշրջանի եզրափակիչ հանդիպումը մայիսի 28-ին անցկացնել ոչ թե Սանկտ Պետերբուրգում, այլ Փարիզում:

ՈւԵՖԱ-ն նաև չեղարկել է հովանավորչական պայմանագիրը ռուսական հսկա «Գազպրոմ»-ի հետ: Պայմանագիր կնքվել է 2012 թվականին և անցյալ տարի երկարաձգվել է ու պետք է գործեր մինչև 2024 թվականը:

Ռուսաստանի ազգային հավաքականը չի կարող մարտին նախատեսված որակավորման հանդիպումներ անցկացնել 2022 թվականին Կատարում կայանալիք ֆուտբոլի աշխարհի առաջնության եզրափակիչ փուլի ուղեգիր նվաճելու համար:

Միջազգային օլիմպիական կոմիտեն միջազգային մարզական բոլոր ֆեդերացիաներին կոչ է արել արգելել ռուսաստանցի մարզիկների մասնակցությունը միջազգային մրցաշարերին:

Եվրամիությունը կազմել է պատժամիջոցների նոր ցուցակ, որում ընդգրկվել են «Ռոսնեֆտի» ղեկավար Իգոր Սեչինը, «Տրանսնեֆտի» ղեկավար Նիկոլայ Տոկարևը, «Պրոմսվյազբանկի» ղեկավար Պյոտր Ֆրադկովը:

Միլիարդատերերից այդ ցուցակում են ներառվել Ալեքսեյ Մորդաշովը, Միխայիլ Ֆրիդմանը, Ալիշեր Ուսմանովը, Պյոտր Ավենը, թավջութակահար-գործարար Սերգեյ Ռոլդուգինը և ուրիշներ:

Պաշտոնյաներից սանկցիաների ցուցակում են փոխվարչապետ Դմիտրի Չերնիշենկոն, շինարարության և տրանսպորտի նախարարներ Իրեկ Ֆայզուլինը և Վիտալի Սավելևը, «Եդինայա Ռոսիա»-ի գլխավոր խորհրդի քարտուղար, Դաշնային խորհրդի փոխնախագահ Անդրեյ Տուրչակը:

Բացի այդ, սանկցիաներ են սահմանվել Կրեմլի խոսնակ Դմիտրի Պեսկովի և մի շարք լրագրողների նկատմամբ, նրանց թվում են Տիգրան Քեոսայանը, Անտոն Կրասովսկին, Արկադի Մամոնտովը, Օլգա Սկաբեևան, Ռոման Բաբայանը, պատմաբան, հրապարակախոս Մոդեստ Կոլերովը և գրող, «Սպրավեդլիվայա Ռոսիա» - «Զա պրավդու» կուսակցության համանախագահ Զախար Պրիլեպինը:

ՄԱԿ-ի Գլխավոր ասամբլեան արտահերթ նստաշրջանում քննարկում է պատերազմը Ուկրաինայում։

«Ուկրաինայում մարտերը պետք է դադարեցվեն», - նախազգուշացրել է ՄԱԿ-ի գլխավոր քարտուղար Անտոնիո Գուտերեշը՝ շարունակելով․ - «Բավական է: Զինվորները պետք է վերադառնան իրենց զորամասեր: Առաջնորդները պետք է շարժվեն դեպի խաղաղություն: Քաղաքացիները պետք է պաշտպանված լինեն»։

Բանաձևի շուրջ քննարկումներում ելույթ ունենալու ցանկություն է հայտնել շուրջ հարյուր երկիր։ Պարտադիր ուժ չունեցող փաստաթուղթը, որը Ռուսաստանից պահանջում է անհապաղ դուրս բերել իր զորքերն Ուկրաինայից, քննարկումների ավարտին կդրվի քվեարկության։