Պատերազմ Ուկրաինայում (լայվ բլոգ, թարմացվող)

Եվրամիության անդամ 27 երկրների արտգործնախարարները հավանություն են տվել Ռուսաստանի դեմ նոր պատժամիջոցներին։ Ռուսական որոշ բանկեր անջատվում են SWIFT համակարգից, Միության տարածքում դադարեցվում է Russia Today-ի հեռարձակումը և Sputnik-ի աշխատանքը, ընդլայնվում է «սև ցուցակը»։

Եվրամիությունը նաև որոշել է փակել օդային տարածքը Ռուսաստանի համար։ Այդ մասին ասվում է այսօր հրապարակված ԵՄ պաշտոնական ամսագրում։ Այնուամենայնիվ, նշվում է, որ իրավասու մարմինները կարող են թույլատրել օդանավին վայրէջք կատարել, օդ բարձրանալ կամ թռչել ԵՄ տարածքի վրայով, եթե դա անհրաժեշտ է մարդասիրական նպատակներով կամ կանոնակարգին համապատասխան որևէ այլ նպատակի համար:

Կիրակի օրն արված արբանյակային պատկերները ցույց են տալիս, որ մեծ քանակությամբ ռուսական ցամաքային ուժեր՝ ներառյալ տանկեր, Կիևից մոտ 65 կիլոմետր հեռավորության վրա են և շարժվում են դեպի Ուկրաինայի մայրաքաղաք, հայտնել է ամերիկյան մի մասնավոր ընկերություն:

Maxar Technologies-ի հրապարակած պատկերներում կարելի է տեսնել բազմաթիվ միավորներ զինտեխնիկա, ավտոշարասյուն, որը մոտ 5 կիլոմետր է ձգվում:

Եվրոպան կարող է ականատես լինել աշխարհամասում վերջին տարիների ամենամեծ հումանիտար ճգնաժամին: Այս նախազգուշացումը տարածել է Եվրահանձնաժողովը Ուկրաինայից մարդկանց զանգվածային արտագաղթի ֆոնին։

Ավելի քան 360 հազար մարդ արդեն լքել է երկիրը, նրանցից 200 հազարը հատել է Լեհաստանի հետ սահմանը։ Բայց ԵՄ-ը պետք է պատրաստվի շատ ավելի մեծ միգրացիոն ճգնաժամի: Դաշինքի բոլոր 27 երկրները համաձայնել են ընդունել ուկրաինացի փախստականներին՝ չկիրառելով ապաստան տրամադրելու ստանդարտ ընթացակարգը, որը հաճախ երկար է ձգձգվում։

Բաց դռների քաղաքականությունը կգործի երեք տարի։ Լեհաստանի հետ մեկտեղ Հունգարիան, Սլովակիան և Ռումինիան նույնպես բացում են իրենց սահմանները՝ ռմբակոծություններից փրկվել փորձողներին ներս թողնելու համար:

Ուկրաինայի պատվիրակությունը ժամանել է Բելառուսի Գոմելի մարզում Ռուսաստանի հետ բանակցությունների վայր, հաղորդել է Գերագույն Ռադայի մամուլի ծառայությունը։

Ռուսաստանի Դաշնության հետ բանակցություններում Կիևի պատվիրակության կազմում են պաշտպանության նախարար Ալեքսեյ Ռեզնիկովը և Զելենսկու գրասենյակի ղեկավարի խորհրդական Միխայիլ Պոդոլյակը։

Ուկրաինայի զինված ուժերի Գլխավոր շտաբը պնդում է, որ ռուսական հարձակման արագությունը դանդաղել է։

«Ռուսաստանցի զավթիչները նվազեցրել են հարձակման տեմպերը, սակայն դեռ շարունակում են հաջողությունը զարգացնելու փորձերը։ Հարձակման ընթացքում հակառակորդը շարունակում է հարվածներ հասցնել քաղաքացիական և ռազմական օդանավակայաններին, հրամանատարական կետերին, ՀՕՊ համակարգերին, բնակավայրերին և պաշտպանական շրջաններում տեղակայված ստորաբաժանումներին։ Հակառակորդը, սակայն, բարոյալքված է և ծանր կորուստներ է կրում», - այսօր հայտարարել է Ուկրաինայի ԶՈւ ԳՇ ներկայացուցիչը։

Ռուսաստանի հետ ռազմական գործողությունների ֆոնին Ուկրաինայի քաղաքացիները և երկրի տարածքում գտնվող օտարերկրացիները շարունակում են լքել երկիրը՝ հեռանալով սահմանակից եվրոպական պետություններ։

Փախստականների հարցերով ՄԱԿ-ի գործակալության տվյալներով՝ Ուկրաինան լքած խաղաղ բնակիչների թիվը կիրակի օրվա դրությամբ 368 հազար է կազմել։

Պաշտոնական Մոսկվան պնդում է, որ Ուկրաինայի տարածք մուտք գործած Ռուսաստանի ԶՈՒ ստորաբաժանումները վերահսկողություն են սահմանել Եվրոպայի խոշորագույն Զապորոժիեի ատոմակայանի նկատմամբ։ Այս մասին հայտարարել է Ռուսաստանի Պաշտպանության նախարարության պաշտոնական ներկայացուցիչ գեներալ-մայոր Իգոր Կոնաշենկովը։

Ուկրաինայի ատոմային էներգետիկան կառավարող «Էներգոատոմ» ընկերությունից, սակայն, կտրականապես հերքում են պաշտոնական Մոսկվայի տարածած այս տեղեկատվությունը՝ հայտարարելով, որ Զապորոժիեի ԱԷԿ-ը և դրա հարևանությամբ գտնվող Էներգոդար քաղաքը շարունակում են վերահսկվել ուկրաինական բանակի կողմից։

Բելառուսի և Ուկրաինայի սահմանին գտնվող Պրիպյատի շրջանում մեկնարկել են Ռուսաստանի և Ուկրաինայի պաշտոնական պատվիրակությունների բանակցությունները։ Այս մասին հայտարարել է Ուկրաինայի նախագահի խորհրդական Միխայիլ Պոդոլյակը։

Ուկրաինան հատուկ ընթացակարգով Եվրամիությանն անդամակցելու պաշտոնական դիմում է ներկայացնում, սոցիալական ցանցերում գրել է երկրի վարչապետ Դենիս Շմիգալը։

«Ուկրաինացիները վաղուց են ապացուցել, որ եվրոպական հանրության անբաժան մասն են։ Եկել է այդ փաստը թղթի վրա ամրագրելու ժամանակը», - նշել է ուկրաինական կառավարության ղեկավարը։ Նրա խոսքով՝ Կիևում հույս ունեն, որ Ուկրաինայի անդամակցության որոշումը անհապաղ կերպով կկայացվի։