Ուկրաինայի զինված ուժերը հաղորդում են կամիկաձե անօդաչու սարքերով Ռուսաստանի գիշերային նոր հարձակումների մասին:
Հաղորդագրության համաձայն՝ թիրախը եղել է Օդեսայի շրջանի նավահանգստային ենթակառուցվածքը, հարվածները հասցվել են «Շահեդ-136/131» տիպի անօդաչու սարքերով։
Ըստ ուկրաինացի զինվորականների՝ հարավարևելյան ուղղությամբ մի քանի ալիքներով հարձակումներ են իրականացվել, Օդեսայի և Նիկոլաևի շրջաններում խոցվել է 13 գրոհային անօդաչու թռչող սարք։
Տարածաշրջանային ռազմական վարչակազմի ղեկավար Օլեգ Կիպերը հայտնել է, որ Դանուբի նավահանգիստներից մեկին հարվածների հետևանքով վնասվել են պահեստներ և ամբարներ։ Հաջորդած հրդեհները մարվել են, տուժածներ չկան, Կիպերի խոսքերն են մեջբերում ուկրաինական լրատվամիջոցները։
Ռուսաստանի պաշտպանության նախարարությունը չի մեկնաբանել այս հաղորդումը։ Ռուսաստանը հուլիսի կեսերից հարվածներ է հասցնում Օդեսայի շրջանին՝ պնդելով, որ թիրախավորում է անանձնակազմ նավերը:
Ռուսաստանի պաշտպանության նախարարությունը հայտնել է, որ այսօր առավոտյան ժամը 5-ի սահմաններում երեք անօդաչու թռչող սարք է խոցվել Կալուգայի շրջանում։
«Ռուսական հակաօդային պաշտպանության համակարգերը ժամանակին հայտնաբերել և ոչնչացրել են բոլոր անօդաչու թռչող սարքերը»,- ասվում է հաղորդագրությունում։
Ըստ գերատեսչության՝ տուժածներ և ավերածություններ չկան։
Ռուսաստանի պաշտպանության նախարարությունը հայտնել է, որ այսօր առավոտյան ժամը 5-ի սահմաններում երեք անօդաչու թռչող սարք է խոցվել Կալուգայի շրջանում։
«Ռուսական հակաօդային պաշտպանության համակարգերը ժամանակին հայտնաբերել և ոչնչացրել են բոլոր անօդաչու թռչող սարքերը»,- ասվում է հաղորդագրությունում։
Ըստ գերատեսչության՝ տուժածներ և ավերածություններ չկան։
Այս գիշեր Ռուսաստանը տարբեր տեսակի թևավոր հրթիռներով հարվածներ է հասցրել Լվովին, Լուցկին, Դնեպրին և Ուկրաինայի այլ քաղաքներին, ուկրաինական ՀՕՊ-ը կարողացել է 28 հրթիռներից 16-ը միայն: Լվովում կան վիրավորներ, վնասվել է ավելի քան հարյուր շենք, այդ թվում՝ մանկապարտեզ։ Լուցկում և Դնեպրում կան զոհեր և վիրավորներ խաղաղ բնակիչների շրջանում։
Ու չնայած ուկրաինական բնակավայրերի չդադարող ինտեսիվ ռմբակոծություններին, Ռուսաստանի նախագահը շարունակում է պնդել, թե մեկուկես տարի տևող այս թեժ պատերազմի համար մեղավոր է Արևմուտքը:
«Մենք Ուկրաինայի օրինակով հստակ տեսնում ենք, թե ուր է տանում կրակի վրա յուղ լցնելու քաղաքականությունը. միլիարդավոր դոլարներ են տրամադրվում նեոնացիստական ռեժիմին, մատակարարելով նրան տեխնիկա, զենք, զինամթերք, ուղարկելով նրանց ռազմական խորհրդատուներին և վարձկաններին։ Ամեն ինչ արվում է հակամարտությունն էլ ավելի թեժացնելու, դրա մեջ այլ պետությունների ներքաշելու համար», - նշել է Վլադիմիր Պուտինը։
Ռուսաստանի պաշտպանության նախարարն էլ կրկին հայտարարել է, թե ուկրաինացիներն այս պատերազմում տանուլ են տալիս։ Շոյգուն այսօր պնդել է, թե Ուկրաինայի ռազմական ռեսուրսը գրեթե սպառվել է, ուստի Կիևը, չնայած Արևմուտքի աջակցությանը, չի կարողանում արդյունքի հասնել մարտի դաշտում։ Նրա խոսքով, մատակարարվող զենքերի մեջ «ռուսական զենքի համար անխոցելի» չկա:
Շոյգուն այս մասին խոսել է բանակային ֆորումին, որին ներկայացված է բացի ռուսականից մի շարք երկրներում, այդ թվում՝ Իրանում, Չինաստանում և Հնդկաստանում արտադրվող ռազմական տեխնիկան։
«Չնայած Արևմուտքի համակողմանի օգնությանը, Ուկրաինայի զինված ուժերը չեն կարողանում արդյունքի հասնել։ Մարտական գործողությունների նախնական արդյունքները ցույց են տալիս, որ Ուկրաինայի ռազմական ռեսուրսները գրեթե սպառվել են», - ընդգծել է ռուսական ռազմական գերատեսչության ղեկավարը:։
Չնայած Շոյգուի այս պնդմանը՝ Ուկրաինայի պաշտպանության փոխնախարարան այսօր հայտարարել է, թե Բախմուտի ուղղությամբ հարավային թևի երկայնքով ուկրաինական ուժերն աստիճանաբար, բայց հաստատ առաջ են շարժվում։
«Գիտեք, որ հարավային թևի երկայնքով մեր զորքերը աստիճանաբար, բայց հաստատապես առաջ են շարժվում՝ մարտերով, մեծ խոչընդոտներով։ Չնայած ականապատված դաշտերի, ավիացիայի և հրետանու հարձակումների մենք առաջ ենք գնում», - ասել է փոխնախարարը:
Միաժամանակ Աննա Մալյարը շեշտել է, թե իրավիճակը ճակատում, այդ թվում՝ հարավում շատ ծանր է, ռուսներն էլ ինտենսիվ գրոհում են ճակատի արևելյան հատվածում, ուկրաինացիները ուժգին դիմադրում են և փորձում են կանխել ռուսների առաջխաղացումը։
Ուկրաինայի Զինված Ուժերի Արևելյան խմբի հրամանատարի տեղակալ Սերգեյ Չերևատին այսօր հայտարարել է, թե ուկրաինական ուժերն ուժեղացրել են կրակային դիրքերը և պահեստազոր տեղափոխել Խարկովից արևելք գտնվող Լիմանսկի - Կուպյանսկի ուղղություն, Նրա խոսքով՝ Ուկրաինայի ցամաքային զորքերի հրամանատար Օլեքսանդր Սիրսկին անձամբ է մեկնել այս ուղղությամբ առաջնագիծ և «ուղիղ, խիստ ու հստակ հրահանգ է տվել բազմաստիճան պաշտպանություն կառուցել»։
«Ամեն ինչ արվեց, որպեսզի թշնամին չկարողանա առաջ շարժվել», - ասել է Չերևատին:
Սակայն Խարկովի շրջանի հրետակոծությունն ուժեղացել է։ Անցյալ շաբաթ Ուկրաինայի իշխանությունները հայտարարեցին Կուպյանսկից և շրջակա մի շարք գյուղերից պարտադիր տարհանման մասին։
ՄԱԿ-ը հաստատել է, որ Ուկրաինայի դեմ արդեն մեկ տարուց ավելի շարունակվող ռուսական հարձակման ընթացքում 9 հազար 444 խաղաղ բնակիչ է զոհվել։
Նրանց թվում 545 երեխա կա, հայտարարել է Մարդու իրավունքների գծով հանձնակատարի գրասենյակը, հավելելով, որ վիրավորների թիվն անցնում է 16 հազարից։
Միջազգային փորձագետները միաժամանակ նշում են, որ տուժածերի մասին իրական տվյալները կարող են ավելի մեծ լինել, քանի դեռ անհնար է հավաստի տեղեկություն ստանալ մի շարք շրջաններից, որտեղ վերջին շրջանում ինտենսիվ մարտեր են ընթանում։
Այս գիշեր Ուկրաինայի գրեթե ամբողջ տարածքում օդային տագնապ է հայտարարվել, ինչպես հաղորդվում է՝ Կասպից ծովի տարածաշրջանից թևավոր հրթիռների արձակման պատճառով։
Ըստ ուկրաինական լրատվամիջոցների՝ պայթյուններ են որոտացել Դնեպրում ու Զապորոժիեում, Խմելնիցկիում և Լվովում։
Լվովի քաղաքապետ Անդրեյ Սադովոյը հայտնել է, որ հրթիռների մի մասը խոցվել է, սակայն եղել են նաև հարվածներ, այդ թվում՝ բնակելի շենքերին։ «Վերին հարկերում հրդեհ է, մարդկանց տարհանում ենք, բոլոր ծառայությունները տեղում են», - գրել է նա X-ում։
Ռուսական բանակը փոքր-ինչ նահանջել է ուկրաինական ինտենսիվ գրոհների պատճառով։ Կիևը հայտարարում է Ուկրաինայի զինված ուժերի հաջողության մասին Ուրոժայնեում և Բախմուտի մերձակայքում։
Անցած շաբաթվա ընթացքում ուկրաինական ուժերը վերադարձրել են Բախմուտի մերձակայքում գտնվող փոքր տարածքը, ասել է պաշտպանության փոխնախարար Աննա Մալյարը. - «Ազատագրվել է 3 քառակուսի կիլոմետր տարածք։ Ընդհանուր առմամբ, հունիսից, երբ սկսվել է ուկրաինական հակահարձակումը, Բախմուտի հատվածի հարավային թևում 40 քառակուսի կիլոմետր է ազատագրվել»։
Մալյարի խոսքով՝ Ուկրաինայի զինված ուժերը «որոշակի հաջողություն» ունեն նաև Դոնեցկի մարզի Ուրոժայնոյե գյուղում։ Ուկրաինական զինուժը սկսել է գրոհել այս բնակավայրն օգոստոսի 8-ին։
Անցած շաբաթավերջին տեղեկություն հայտնվեց, որ ռուսական բանակը սկսել է նահանջել Ուրոժայնոյեից։ Այս բնակավայրում կար ռուսական զորքերի ամրացված տարածք Մոկրոյե Յալի գետի ափին։
The New York Times-ը օգոստոսի 13-ին գրել էր, թե Ուկրաինայի զինված ուժերը «տակտիկապես նշանակալի» առաջընթաց են գրանցել Ուկրաինայի հարավի երկու հիմնական ճակատներում: Հրատարակության տվյալներով՝ ուկրաինական զորքերը վերահսկողության տակ են վերցրել 16-ից 20 կիլոմետր տարածք Բերդյանսկի ու Մելիտոպոլի ուղղությամբ։
«Բանակ 2023» ֆորումին Ռուսաստանի նախագահը հայտարարել է, թե պատրաստ է ռազմական համագործակցության սեփական շահերն ու ինքնիշխանությունը պաշտպանող երկրների հետ։
«Վստահ եմ, որ ֆորումը կօգնի ամրապնդել ռազմական և ռազմատեխնիկական համագործակցությունը՝ ի շահ անվտանգության և կայունության բազմաբևեռ աշխարհում», - ասել է Վլադիմիր Պուտինը։
Այն ընթացքում, երբ Պուտինը խոսում էր բազմաբևեռ աշխարհի մասին, Մոսկվայի բորսայում դոլարի փոխարժեքը գերազանցել է 100 ռուբլին։ Սա առաջին անգամն է 2022 թվականի մարտի 23-ից հետո։ Եվրոն նույնպես բարձրացել է՝ երկուշաբթի առավոտյան գերազանցելով 110 ռուբլու նշագիծը։ Տարեսկզբից ռուբլին դոլարի նկատմամբ նվազել է ավելի քան 30 տոկոսով։
Ռուսական բանակը շարունակում է ինտենսիվ ռմբակոծել ուկրաինական բնակավայրերը։ Վերջին օրերին ուժգին հարվածների տակ է Օդեսա քաղաքը, որի երկնքում ուկրաինական ՀՕՊ-ը միայն այս գիշեր կարողացել է խոցել 15 անօդաչու և ութ կալիբր հրթիռ։ Ռուսաստանի պաշտպանության նախարարությունը հայտարարություն է տարածել, ըստ որի՝ օգոստոսի 14-ի գիշերը ռուս զինվորականները հարվածել են Ուկրաինայի զինված ուժերի «հեռակառավարվող նավակների արտադրության և պահեստավորման վայրերի վրա»։
Հուլիսին ՊՆ-ն այս գնդակոծություններն անվանել էր «պատասխան հարվածներ» Ղրիմի կամրջի վրա հարձակման համար։
Հարվածի տակ էին վերջին օրերին նաև Խարկովի, Զապորոժիեի և Խերսոնի մարզերը։
Խերսոնի մարզում երկուշաբթի օրը հայտարարված է սգո օր։ Կիրակի օրը այդ շրջանի Շիրոկայա Բալկա գյուղի հրետանային գնդակոծության արդյունքում զոհվել է մի ամբողջ ընտանիք՝ ծնողներ և նրանց երկու երեխաները։
«Առավոտյան՝ ժամը 9-ին, օկուպանտները հարվածել են Շիրոկայա Բալկա գյուղին։ Հրետանուց հինգ մահացած կա, նրանց թվում՝ փոքրիկ աղջիկ, նա 22 օրական էր։ Նրա եղբորը, որը ընդամենը 12 տարեկան էր, հիվանդանոց տեղափոխեցին։ Ցավոք, նրան չեն կարողացել փրկել։ Նա մահացել է ստացած ծանր վնասվածքներից», - հայտարարել է նախագահ Վլադիմիր Զելենսկին։
Ընդհանուր առմամբ, Խերսոնի շրջանում կիրակնօրյա հրետակոծության զոհ է դարձել 7 մարդ, վիրավորվել՝ 13-ը։
Անցած շաբաթ ուկրաինական ուժերը վերահսկողություն են հաստատել Բախմուտի մերձակայքում գտնվող՝ 3 քառակուսի կիլոմետր տարածքում, հայտարարել է Ուկրաինայի պաշտպանության փոխնախարար Աննա Մալյարը։
Նրա խոսքերով հունիսից՝ ուկրաինական հակահարձակման մեկնարկից ի վեր Բախմուտի հարավային թևում ընդհանուր առմամբ 40 քառակուսի կիլոմետր է ազատագրվել։ Մալյարը հայտարարել է նաև Ուկրաինայի զինված ուժերի «որոշակի հաջողության» մասին Դոնեցկի մարզի Ուրոժայնոյե գյուղում։ Ռուսական կողմն այս պնդումները չի հաստատում։
The New York Times-ի երեկ հրապարակած տվյալների համաձայն՝ Ուկրաինայի զինված ուժերը «տակտիկական նշանակալի» առաջընթաց են գրանցել Ուկրաինայի հարավի երկու հիմնական ճակատներում: Թերթի համաձայն՝ ուկրաինական զորքերը վերահսկողություն են հաստատել 16-ից 20 կիլոմետր տարածքում՝ Բերդյանսկի ու Մելիտոպոլի ուղղությամբ: