Կիևում Լեհաստանի դեսպան Բարտոշ Ցիխոնսկին նախօրեին հրավիրվել է Ուկրաինայի արտգործնախարարություն, հաղորդում են ուկրաինական աղբյուրները՝ տեղեկացնելով, որ հրավերի պատճառը Լեհաստանի նախագահի աշխատակազմի բարձրաստիճան ներկայացուցիչներից մեկի՝ Միջազգային քաղաքականության գրասենյակի ղեկավար Մարցին Փշիդաչի վերջին հայտարարություններն էին։
Լեհ պաշտոնյան, մասնավորաբար, հայտարարել էր, թե «հարկավոր է արդեն գնահատել այն դերը, որ Ուկրաինայի համար խաղացել է Լեհաստանը վերջին ամիսների և տարիների ընթացքում»։
Սրան ի պատասխան՝ Ուկրաինայի նախագահի աշխատակազմի ղեկավարի տեղակալ Անդրեյ Սաբիգան լեհ պաշտոնյայի հայտարարությունները Ֆեյսբուքում «մանիպուլյատիվ» է որակել։
«Նման կարծիքները նպատակ ունեն լեհ հանրության մոտ տպավորություն ստեղծել, որ Ուկրաինան իբր չի գնահատում ռուսական ագերսիայի դեմ Լեհաստանի ցուցաբերած աջակցությունը», - պնդել է ուկրաինացի պաշտոնյան։
Անցած գիշեր իրականացված ռուսական հարվածների հետևանքով վնասվել են Օդեսայի և Իզմայիլի նավահանգիստները, հաղորդում են ուկրաինական պաշտոնական աղբյուրները։
«Ռումինիայի հետ սահմանին,Դանուբ գետի վրա գտնվող Իզմայիլի նավահանգստում ռուսական անօդաչու թռչող սարքերի հարվածների հետևանքով վնասվել է հացահատիկի այն պահեստը, որ օգտագործվում էր ուկրաինական գյուղմթերքի արտահանման գործարքի շրջանակներում», - հաղորդել է Ուկրաինայի պաշտպանության նախարարությունը։
Անցած գիշեր ռուսական ԱԹՍ-ները հարվածել են Դանուբ գետի վրա գտնվող ևս մեկ ուկրաինական նավահանգստին՝ Ռենիին, ինչպես նաև Օդեսայի նավահանգստի ենթակառուցվածքներին։
Վարշավան առաջարկում է ամբողջությամբ արգելափակել ԵՄ սահմանը Բելառուսի հետ։ Այսօր, լրագրողների հետ զրույցում, նման հայտարարությամբ է հանդես եկել Լեհաստանի փոխարտգործնախարար Մացեյ Վոնսիկը։
«Լեհաստանը, Լիտվան և Լատվիան պետք է ամբողջությամբ մեկուսացնեն Բելառուսը», - նշել է լեհ դիվանագետը։
Վոնսիկի հայտարարությունը հնչել է այն բանից հետո, երբ Լեհաստանի պաշտպանության նախարարությունը հայտնել է, որ նախօրեին բելառուսական երկու ռազմական ուղղաթիռներ հատել են սահմանը՝ հայտնվելով հարևան երկրի օդային տարածքում։ Դա, ըստ Վարշավայի, տեղի է ունեցել Բելառուսի արևմուտքում ընթացող զորավարժությունների ժամանակ։
«Այս միջադեպը ընկալվում է որպես լեհ-բելառուսական սահմանին իրադրության լարման հերթական դրվագ», - հայտարարում են Վարշավայում։
Օգոստոսի 2-ի գիշերը Ռուսաստանը դարձյալ իրանական «Շահիդ» անօդաչուներով հարձակվել է Կիևի և Օդեսայի վրա. մայրաքաղաքում պայթյուններ են հնչել։
Կիևի իշխանությունները հայտնում են, որ մայրաքաղաք թռչող բոլոր կամիկաձե անօդաչուները խոցվել են, Կիևի բնակիչների մեջ զոհեր և վիրավորներ չկան։
«Անօդաչու թռչող սարքերի խմբերը միաժամանակ մի քանի ուղղություններից ներխուժեցին Կիև: Սակայն, բոլոր օդային թիրախները՝ ավելի քան 10-ը անօդաչու թռչող սարք, ժամանակին հայտնաբերվեցին և ոչնչացվեցին հակաօդային պաշտպանության ուժերի կողմից»,- հայտնում է քաղաքային ռազմական վարչակազմի ղեկավար Սերգեյ Պոպկոն։
Ըստ Կիևի քաղաքապետ Վիտալի Կլիչկոյի՝ քաղաքի երեք թաղամասերում ընկել են խոցված անօդաչու թռչող սարքերի բեկորներ, սակայն լուրջ վնասներ չկան՝ մի տեղ վնասվել է ոչ բնակելի շենք, մյուսում՝ ծառը։
Ուկրաինա ռուսական լայնամասշտաբ ներխուժման սկզբից ի վեր մոտ 50 հազար ուկրաինացի կորցրել է ձեռքերն ու ոտքերը, հայտնում է The Wall Street Journal-ը՝ վկայակոչելով պրոթեզների աշխարհի խոշորագույն արտադրողին՝ գերմանական Ottobock ընկերությանն ու նրա գործընկերներին:
Ըստ WSJ-ի՝ վերջույթները կորցրած ուկրաինացիների թիվը կարող է ավելի մեծ լինել, քանի որ պրոթեզավորումը ժամանակ է պահանջում, և որոշ տուժածներ վնասվածքից հետո շաբաթներ կամ ամիսներ շարունակ ամպուտացիայի են սպասում։
Հեղինակավոր լրատվամիջոցը շեշտում է, որ բացի այդ, պրոթեզների արժեքը կարող է հասնել մինչև 50 հազար եվրոյի, մինչդեռ ուկրաինական իշխանությունները յուրաքանչյուր վիրավոր զինվորին վճարում են մինչև 20 հազար եվրո, իսկ քաղաքացիական անձինք հաճախ ընդհանրապես չեն կարողանում բուժվել և ստիպված են լինում դիմել բարեգործական կազմակերպությունների։
Ռուսական ուժերի կողմից Խերսոնը հրթիռակոծելու հետևանքով հիվանդանոցում բժիշկ է զոհվել, իսկ բուժքույրը վիրավորվել է։
Մարզի վարչակազի առողջապահության բաժնի ղեկավար Տատյանա Կարչևիչն ասել է, որ երիտասարդ բժիշկը առաջին օրն էր աշխատանքի անցել։
«Երիտասարդ բժիշկը մահացավ, տաղանդավոր բժիշկ։ Վերապատրաստվելուց հետո սա նրա աշխատանքի առաջին օրն էր, որն ավարտվեց անգամ դեռ չսկսված»,- ասել է նա։
Խերսոնի նահանգապետ Ալեքսանդր Պրոկուդինն ասել է, որ հրետակոծության հետևանքով վնասվել է հիվանդանոցի վիրահատական բաժինը։
ՄԱԿ-ի Մարդու իրավունքների գերագույն հանձնակատարի գրասենյակի վերջին զեկույցի համաձայն, հուլիս ամսին Ուկրինայում 143 քաղաքացիական անձ է զոհվել, այդ թվում՝ չորս երեխա։ Ռուսական ուժերի հարվածների հետևանքով Ուկրաինայում քաղաքացիական զոհերի ճշգրտված թիվը հասել է 9 հազար 369 մարդու։
ՄԱԿ-ի յուրաքանչյուր զեկույցում նշվում է, որ զոհերի թիվը իրականում կարող է ավելի մեծ լինել, քանի որ ստույգ տվյալներ չկան ռուսական ուժերի գրաված ուկրաինական քաղաքներից։
Ռուսաստանի պաշտպանության նախարարությունը հաղորդում է՝ այս գիշեր ուկրաինական երկու անօդաչուներ են խոցվել Մոսկվայի շրջանի երկնքում։
Կրեմլը հայտնում է, որ մեկ անօդաչու էլ ռադիոէլեկտրոնային միջոցների կիրառման արդյունքում կորցրել է կառավարումը և բախվել «Մոսկվա սիթի» ոչ բնակելի համալիրին։
Մոսկվայի քաղաքապետ Սերգեյ Սոբյանինն ասել է, որ վնասվել է 21-րդ հարկի ապակեպատ ճակատը, մարդիկ չեն տուժել։ Այս շենքում է գտնվում Ռուսաստանի տնտեսական զարգացման նախարարությունը։
Անցած կիրակի ևս դրոնը հարվածել էր «Մոսկվա սիթի» շենքին, մեկ մարդ էր տուժել։
Ուկրաինայի պաշտպանության նախարությունը հայտնել է, որ երկուշաբթի օրը Թուրքիայի հետ պայմանագիր է ստորագրվել Ուկրաինայի տարածքում ԱԹՍ վերանորոգման և սպասարկման ձեռնարկություն կառուցելու մասին։
Հուլիսի սկզբին ուկրաինական լրատվամիջոցները հաղորդել էին, որ թուրքական Baykar ընկերությունը սկսել է անօդաչու թռչող սարքերի արտադրության գործարանի կառուցումը։
Ուկրաինայի փոխվարչապետ Միխայիլ Ֆյոդորովը հայտնել էր, որ ԱԹՍ-ների կառավարման 10 հազար օպերատորներ են պատրաստվել, ևս 10 հազար մասնագետների ուսուցումը ընթացքի մեջ է։
Կրիվոյ Ռոգ ուկրաինական քաղաքին ռուսների հասցրած հրթիռակոծության հետևանքով զոհվել է առնվազն չորս մարդ, այդ թվում՝ տասնամյա մի աղջիկ և նրա 45-ամյա մայրը:
Ենթադրվում է, որ ավերակների տակ կարող են մարդիկ գտնվել՝ ողջ, թե զոհված, դեռ հայտնի չէ: Տարբեր աստիճանի վնասվածքներ են ստացել 53 բնակիչներ: Հրթիռը հարվածել է 9-հարկանի շենքին:
Ըստ ուկրաինական իշխանությունների, մեկ հրթիռ էլ հարվածել է Կրիվոյ Ռոգի համալսարանի 4-հարկանի շենքին:
Ուկրաինայի ներքին գործերի նախարար Իգոր Կլիմենկոն ասել է, որ 9-հարկանի շենքում ավերվել է 4-րդից 9-րդ հարկերի հատվածը: