Ուկրաինայի մայրաքաղաք Կիևում ձերբազատվում էն խորհրդային ժամանակաշրջանից մնացած առավել հայտնի սիմվոլներից:
Բանվորները մագլցել են Մայր Հայրենիքի 62-մետրանոց արձանը և ապամոնտաժել են մուրճն ու մանգաղը:
«Ուկրաինայում սերունդներ են երազել այս պահի մասին, պահ, երբ թշնամու սիմվոլները մեր հողում էլ չեն լինի», - ասել է Ուկրաինայի պատմության ազգային թանգարանի տնօրեն Յուրի Սավչուկը:
Այդ արձանը համարվում է ամենաբարձրը Եվրոպայում: Ավանդական սովետական զինանշանն օգոստոսի 24-ին՝ Ուկրաինայի անկախության օրը, կփոխարինվի ուկրաինական եռաժանիով:
Մոսկվայի վրա ԱԹՍ-ներով հարձակումից հետո, ինչի հետևանքով Ռուսաստանի մայրաքաղաքում երեկ շենքեր են վնասվել, կարճ ժամանակով փակվել էր «Վնուկովո» օդանավակայանը։
Ուկրաինայի նախագահ Վլադիմիր Զելենսկին տեսաուղերձով հայտարարել է՝ Ռուսաստանի տարածքի վրա հարձակումները երկու երկրների միջև պատերազմի «անխուսափելի, բնական և բացարձակապես արդար գործընթաց են»:
Զելենսկու խոսքով՝ պատերազմը վերադառնում է Ռուսաստանի տարածք։
Մոսկվան և Կիևը երեկ հայտնել են միմյանց տարածքների վրա անօդաչու թռչող սարքերով հարվածների մասին։
Չեխիայի իշխանությունները կալանքի տակ են վերցրել ռուս միլիարդատեր Վլադիմիր Եվտուշենկովի ընկերությունների հաշիվները և Կարլովի Վարիում նրան պատկանող Savoy Westend հինգաստղանի հյուրանոցը։
Այդ որոշումը կայացվել է Եվտուշենկովի նկատմամբ այս տարվա հունիսին Չեխիայի սահմանած պատժամիջոցների շրջանակներում:
Եվտուշենկովից կալանված գումարը մոտ 4 միլիոն 600 հազար դոլար է, իսկ Կարլովի Վարիում նրա հյուրանոցի արժեքը մոտ 23 միլիոն դոլար:
ԱՄՆ պետքարտուղար Էնթոնի Բլինկենի համոզմամբ, Ռուսաստանի պաշտպանության նախարար Սերգեյ Շոյգուի այցը ԿԺԴՀ վկայում է զենք գնելու Ռուսաստանի ցանկության մասին։ Այդ մասին պետական քարտուղարը խոսել է Ավստրալիայում՝ Բրիսբեն քաղաքում «2+2» ձևաչափով բանակցություններից հետո:
Պետքարտուղարի հետ այդ բանակցություններին մասնակցել են ԱՄՆ պաշտպանության նախարար Լոյդ Օսթինը և Ավստրալիայի պաշտպանության ու արտաքին գործերի նախարարներ Ռիչարդ Մարլսն ու Փենի Վոնգը:
«Ինչ վերաբերում է Հյուսիսային Կորեայում Ռուսաստանի {պաշտպանության} նախարարի այցի մասին հաղորդագրություններին, ապա ես խիստ կասկածում եմ, թե նա այնտեղ արձակուրդում է»,- ասել է Բլինկենը։
ԱՄՆ պետական քարտուղարի խոսքով, Ռուսաստանը հուսահատ վիճակում աջակցություն ու զենք է փնտրում:
«Եվ մենք դա տեսնում ենք Հյուսիսային Կորեայում»,- ասել է ԱՄՆ արտաքին գերատեսչության ղեկավարը:
Նրա ելույթի սղագրությունը տարածել է Միացյալ Նահանգների պետական դեպարտամենտի մամուլի վարչությունը։
Սերգեյ Շոյգուի ղեկավարած ռուսական պատվիրակությունն այցելել է Հյուսիսային Կորեա, որտեղ մասնակցել է «1950-1953 թվականների պատերազմում Կորեայի ժողովրդի մեծ հաղթանակի 70-ամյակի տոնակատարությանը»։
Շոյգուն Փհենյանում Հյուսիսային Կորեայի հիմնադիր առաջնորդ Կիմ Իր Սենի հրապարակում ներկա է եղել հանդիսավոր զորահանդեսին։ Բացի այդ, նա բանակցություններ է վարել Հյուսիսային Կորեայի ներկայիս առաջնորդ Կիմ Չեն Ընի հետ։
ՌԴ պաշտպանության նախարարությունը հայտնել է, որ զրույցի ընթացքում մտքեր են փոխանակվել համաշխարհային և տարածաշրջանային անվտանգության հարցերի շուրջ, և քննարկվել են Մոսկվայի ու Փհենյանի համագործակցության զարգացման հնարավորությունները:
Լեհաստանի վարչապետ Մատեուշ Մորավիեցկին այսօր հայտարարել է, որ Բելառուսում գտնվող «Վագներ» խմբավորման ավելի քան 100 վարձկաններ տեղակայվել են այսպես կոչված՝ Սուվալկի միջանցք՝ Լեհաստանի և Լիտվայի սահմանների մոտ։
Սուվալկի միջանցքը Լեհաստանն ու Լիտվան կապող տարածք է, որի լայնությունը մոտ 100 կիլոմետր է։ Այդ տարածքից դեպի հյուսիս-արևմուտք Ռուսաստանի Կալինինգրադի մարզն է, հարավ-արևելքում՝ Բելառուսի տարածքը։
Ռուսաստանի և ՆԱՏՕ-ի միջև հիպոթետիկ զինված հակամարտության մասին տարբեր հրապարակումներում հաճախ է նշվում, որ նման հակամարտության պարագայում Ռուսաստանը, կտրելով այս միջանցքը, կարող է Բալթյան երկրները կտրել Լեհաստանից և, հետևաբար, Արևմտյան Եվրոպայից։
Մորավիեցկին չի հստակեցրել, թե որտեղից է ստացել վագներականների տեղաբաշխման մասին տվյալներըմ և որոնք կարող են լինել նրանց առաջադրանքները: Նրա գնահատմամբ՝ այդ զարգացումը «քայլ է դեպի նոր հիբրիդային հարձակում Լեհաստանի տարածքում»: Լեհ պաշտոնյան հիշեցրել է, որ վերջին տարիներին կտրուկ աճել են Բելառուսի տարածքից Լեհաստանի և ԵՄ այլ երկրների սահմաններն ապօրինի հատելու փորձերը, և ենթադրել, որ «Վագների» զինյալները կարող են թե՛ միգրանտներին օգնել լեհական սահմանը հատելիս, թե՛ իրենք, ներկայանալով որպես միգրանտներ, փորձել հատել սահմանը։
«Վագները» և Բելառուսի իշխանությունները դեռևս չեն մեկնաբանել Մորավիեցկու պնդումները։ Լեհաստանի վարչապետի խոսքերը անկախ աղբյուրները ևս դեռ չեն հաստատել։
Հարավաֆրիկյան Հանրապետության նախագահ Սիրիլ Ռամապոսան Սանկտ Պետերբուրգում Ռուսաստանի նախագահի հետ աֆրիկյան առաջնորդների հանդիպմանը Վլադիմիր Պուտինին կոչ է արել վերադառնալ հացահատիկի գործարքին։ Միաժամանակ նա հասկացրել է, որ Աֆրիկայում հացահատիկ մատակարարելու Ռուսաստանի առաջարկները, այդ թվում՝ անվճար, չեն կարող փոխարինել «սևծովյան համաձայնագրին»։
«Մենք չենք եկել «նվերներ» խնդրելու, իհարկե, հասկանում ենք, որ Դուք, մեծահոգաբար որոշել եք առանց փոխհատուցման հացահատիկ տրամադրել աֆրիկյան որոշ երկրների, որոնք բախվում են դժվարությունների... բայց մեր նպատակը դա չէ , մեր հիմնական խնդիրը նմանօրինակ մատակարարումների հասնելը չէ»,- ասել է Ռամապոզան, հարավաֆրիկացի առաջնորդի խոսքերը մեջբերել է Կրեմլի մամլո ծառայությունը։
Պուտինն ավելի վաղ խոստացել էր 25-50 հազար տոննա հացահատիկ անվճար մատակարարել վեց պետությունների՝ Բուրկինա Ֆասոյին, Զիմբաբվեին, Մալիին, Սոմալիին, Կենտրոնական Աֆրիկյան Հանրապետությանը և Էրիթրեային։ Ըստ տարբեր գնահատականների՝ Ռուսաստանի առաջարկած ծավալն այդ երկրներին անհրաժեշտ հացահատիկի միայն չնչին մասն է։
ՌԴ նախագահը նաև հայտարարել է, որ Մոսկվան պատրաստ է աֆրիկյան շուկայում ուկրաինական հացահատիկը փոխարինել կոմերցիոն հիմունքներով։
Ռուսական զորքերը երեկ երեկոյան կրկին հրթիռային հարվածներ են հասցրել Ուկրաինային։ Դնեպրում թիրախավորվել է բազմահարկ բնակելի շենք, հաղորդվում է ինը տուժածի մասին, այդ թվում՝ երկու անչափահաս երեխաներ։
Ուկրաինայի նախագահ Վլադիմիր Զելենսկին հայտարարել է, որ Դնեպրում բացի բնակելի շենքից, վնասվել է է նաև անվտանգության ծառայության վարչական շենքը։
Ավելի վաղ Դնեպրի քաղաքապետ Բորիս Ֆիլատովը տելեգրամյան իր ալիքում հայտնել էր, որ ռուսական ուժերի հրթիռային հարձակման թիրախը Դնեպրոպետրովսկի մարզում Ուկրաինայի անվտանգության ծառայության գրասենյակի շենքն է։ Նրա խոսքով՝ արդեն երրորդ անգամ են փորձում գնդակոծել կառույցը, որը, ուկրաինացի պաշտոնյայի պնդմամբ, դատարակ է։
Գնդակոծությունների մասին են հաղորդում նաև Ռուսաստանի վերահսկողութան տակ գտնվող Դոնեցկից։ Տեղի իշխանությունները հայտնում են մեկ զոհի, ութ վիրավորի մասին։
Ուկրաինայում ռազմական գործողությունների ընթացքում ևս մեկ վրաց կամավոր է զոհվել։ Վրացական լրատվամիջոցների համաձայն՝ Աչիկո Դևրիսաշվիլին մահացել է Բախմուտի մոտ։
«Պիրվելի» հեռուստաընկերության տվյալներով՝ Դևրիսաշվիլին ուկրաինական գումարտակներից մեկի հրամանատարներից է։
Անցյալ տարվա փետրվարից ի վեր Ուկրաինայում մոտ 40 վրացի կամավոր է զոհվել։ Վրացական իշխանությունները Ուկրաինա Ռուսաստանի ռազմական ներխուժման առաջին օրերից փորձել են կանխել վրաց կամավորականների խմբերի Ուկրաինա մեկնումը։ Ի պատասխան նախագահ Վլադիմիր Զելենսկին պատերազմի մեկնարկից մի քանի օր անց հետ կանչեց Թբիլիսիում Ուկրաինայի դեսպանին՝ վրացական իշխանություններին քննադատելով Կիևին բավարար աջակցություն չցուցաբերելու համար։
Ռուսաստանի նախագահ Վլադիմիր Պուտինը անպատասխան է թողել Թուրքիայի նախագահ Ռեջեփ Էրդողանի՝ հացահատիկի գործարքի երկարաձգման շուրջ բանակցելու խնդրանքը։ Այս մասին հայտնում է The Wall Street Journal-ը՝ վկայակոչելով իր դիվանագիտական աղբյուրները։
Հուլիսի 17-ին հացահատիկի համաձայնագրից Ռուսաստանի դուրս գալուց հետո Էրդողանը բազմիցս հայտարարել է, որ ցանկանում է Պուտինի հետ քննարկել գործարքի վերսկսումը, սակայն նախագահների միջև շփումներ տեղի չեն ունեցել։ Ամերիկյան լրատվամիջոցի աղբյուրները տեղեկացրել են, որ Անկարան այժմ փորձում է Կրեմլի հետ կապ հաստատել հաղորդակցության այլ ուղիներով։ Թե որոնք են դրանք, չի նշվում։
The Wall Street Journal-ի զրուցակիցները պնդում են, որ Կրեմլը հրաժարվել է երկարաձգել հացահատիկի գործարքը այն բանից հետո, երբ Թուրքիան Ուկրաինային է վերադարձրել «Ազով» գնդի զինյալներին, որոնք փոխանակման արդյունքում Ստամբուլ էին տեղափոխվել պայմանով, որ պետք է մնային Թուրքիայում մինչև պատերազմի ավարտը։ Թերթը հավելում է, որ Մոսկվայի դժգոհությունն էր հարուցել նաև Էրդողանի կողմից ՆԱՏՕ-ին Շվեդիայի անդամակցության դիմումին հավանություն տալը։
Թուրքիայի նախագահը, ում միջնորդությամբ մեկ տարի առաջ ստորագրվել էր գործարքը, հույս էր հայտնել, որ սևծովյան նախաձեռնությունը կարող է վերսկսել աշխատանքը ՌԴ նախագահի հետ հանդիպումից հետո, որն, Էրդողանի խոսքով, նախատեսված է օգոստոսին՝ Թուրքիայում։ Կրեմլը հանդիպման ժամկետներ չի հայտնել։
Ռոստովի մարզի նահանգապետ Վասիլի Գոլուբևը հայտնել է, որ Տագանրոգի կենտրոնում «ենթադրաբար հրթիռ է պայթել»։ Նրա ասելով՝ զոհեր չկան։
Ռուսական լրատվամիջոցները, վկայակոչելով արտակարգ ծառայությունները, հաղորդում են, որ այս պահի դրությամբ հայտի է 12 տուժածների մասին։ Պայթյունի վայրում փլատակներ կան, որոնց տակ հնարավոր է մարդիկ լինեն։
Տագանրոգը հարավում Ուկրաինային սահմանակից շրջան է։