Շիրակի թեմի առաջնորդ Միքայել արքեպիսկոպոս Աջապահյանի կալանավորումը Գյումրիում մի քանի կոնկրետ բառերով են բնոշորում՝ «ահավոր է, անարդար է, խայտառակություն»:
«Անպատվություն է, ազգային վիրավորանք ու հիասթափություն»,- նշեց գյումրեցիներից մեկը:
Մայր աթոռում իրավապահների երեկվա գործողություններից ու թեմի առաջնորդի կալանավորումից հետո այսօր տեսախցիկի առաջ շատերը խուսափում էին խոսել: Ոմանք էլ, չցանկանալով տեսանկարահանվել, տեսախցիկից այն կողմ թեմի առաջնորդի ձերբակալությունը «շոու» էին որակում, իսկ կալանավորումն՝ անարդար:
Երեկոյան սուրբ Յոթվերք եկեղեցում ժամերգություն էր: Առաջնորդարանի դռները բաց էին, բայց թեմի առաջնորդի կեցարանը, որտեղ երեկ խուզարկություն էին արել ու Աջապահյանի համակարգիչն առգրավել, փակ էր: Տեր Նշան քահանա Պանֆյորովը երեկ ամբողջ օրը Մայր Աթոռում սրբազանի կողքին էր: Նրա համար երեկվա իրադարձությունները սպասելի էին:
Տեր Նշանն ընդգծում է՝ վերջին օրերին կալանավորված երկու արքեպիսկոպոսները առաջին կալանավորված եկեղեցականները չեն հայոց եկեղեցու պատմության մեջ: Դրանով, ըստ նրա, իշխանությունները փորձում են վախ սերմանել. - «Էն մարդկանց, որոնք փորձում են գլուխ բարձրացրացնել ու իրենց գործողություններին հակառակ խոսել, բոլորին վախեցնելու մեսիջ էր: Բայց դա չի ստացվի»:
«Բանտում Փաշինյանին էլ է այցելել»
Միքայել արքեպիսկոպոս Աջապահյանը, շուրջ քառորդ դար առաջնորդելով Շիրակի թեմը, բոլոր իշխանություններին է քննադատել՝ հաճախ անխնա: 2008-ի հետընտրական իրադարձություններից հետո թերևս միակ թեմի առաջնորդն էր, ով այցելում էր բանտերում հայտնված մարդկանց ու նրանց հացուդուլները դադարեցնում: Տեր Նշանը հիշեցրեց՝ Նիկոլ Փաշինյանին էլ է սրբազանը Արթիկի բանտում այցելել. - «Ինքը հո՞ լավ գիտի..., իր տիկինն էլ է եկել, հանդիպել սրբազանին: Բայց դե երախտամոռ մարդիկ են»:
Տեր Նշանը ասում է՝ ճաղերից այն կողմ էլ սրբազանը շարունակում է ղեկավարել թեմը: Թերևս միակ լավ բանն, ըստ քահանայի, այն է, որ արքեպիսկոպոսն ի վերջո ժամանակ կունենա հանգստանալու:
Մանրամասները «Ազատության» տեսանյութում.